QR Prezıdenti shet elder basshylary men qazaqstandyqtarǵa rızashylyǵyn bildirdi
Prezıdent Qasym-Jomart Toqaev Qaraǵandy oblysyndaǵy qaıǵyly oqıǵaǵa oraı kóńil aıtqan barlyq shet memleketter basshylary men qazaqstandyqtarǵa rızashylyǵyn bildirdi, dep habarlaıdy Kazinform.
«Qaza bolǵan kenshilerdiń otbasylaryna kóńil aıtyp, osynaý qıyn sátte jyly lebizderin joldap, qoldaý kórsetken memleketter basshylaryna, qoǵam qaıratkerlerine, azamattarǵa shynaıy rızashylyǵymdy bildiremin», – dep jazdy Memleket basshysy H paraqshasynda.
Eske salaıyq, búgin túnde Qaraǵandy oblysyndaǵy Kostenko atyndaǵy shahtada órt boldy. Saǵat 17.33-tegi málimet boıynsha 33 kenshiniń denesi tabyldy,13 adam izdestirilip jatyr.
Keshqurym brıfıng ótkizgen Tótenshe jaǵdaılar mınıstri Syrym Sháriphanov jer astynda qalǵan kenshilerdi tiri tabýǵa úmit óte az ekenin málim etti.
Kásibı áskerılendirilgen apattyq-qutqarý qyzmetteriniń respýblıkalyq ortalyq shtaby Qaraǵandy fılıaly dırektorynyń orynbasary Jumat Ókenov mert bolǵan kenshilerdiń jeke basyn anyqtaý qıynǵa túsip jatqanyn aıtty.
29 qazan Jalpyulttyq aza tutý kúni bolyp jarııalandy. Memleket basshysy Qasym-Jomart Toqaev Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.
Apatqa baılanysty Reseı, Belarýs, Qyrǵyzstan, Frantsııa, Ózbekstan prezıdentteri men Túrkııa Syrtqy ister mınıstrligi kóńil aıtty.
