QR Prezıdenti Ortalyq Azııa elderine uzaqmerzimdi yntymaqtastyq josparyn ázirleýdi usyndy
ASTANA. KAZINFORM – Prezıdent Qasym-Jomart Toqaev Ortalyq Azııa jáne Ázerbaıjan memleketteri basshylarynyń beıresmı Konsýltatıvtik kezdesýi barysynda sóılegen sózinde ózara senimniń nyǵaıýy men óńirlik yntymaqtastyqtyń qarqyndy damýynyń arqasynda Ortalyq Azııa jańa tarıhyndaǵy asa tabysty kezeńdi bastan ótkerip jatyr dep nyq senimmen aıtýǵa bolatynyn jetkizdi.
Memleket basshysy osy mańyzdy Shartqa qosylǵany úshin Túrikmenstan Prezıdenti Serdar Berdimuhamedovke alǵys aıtty.
– Kelesi kezeń atalǵan qujat erejelerin naqty iske asyrý bolýǵa tıis dep sanaımyn. Osyǵan baılanysty dostyq pen tatý kórshilikti odan ári nyǵaıtýǵa, saýda-ekonomıkalyq, mádenı-gýmanıtarlyq qarym-qatynasty bekemdeýge baǵyttalǵan uzaqmerzimdi ózara yqpaldastyǵymyzdyń anyq baǵdarlary kórsetilgen is-sharalar josparyn ázirleýdi jáne qabyldaýdy usynamyn. Ózara senimniń nyǵaıýy men óńirlik yntymaqtastyqtyń qarqyndy damýynyń arqasynda Ortalyq Azııa jańa tarıhyndaǵy asa tabysty kezeńdi bastan ótkerip jatyr dep nyq senimmen aıtýǵa bolady, – dedi Qasym-Jomart Toqaev.
Prezıdent Ázerbaıjannyń Konsýltatıvti kezdesýlerdiń tolyq múshesi bolýy bul formatty nyǵaıtýdaǵy oń evolıýtsııanyń jańa deńgeıin kórsetetinin málimdedi.
– Birlesken kúsh-jigerimiz arqyly saıası dıalogty odan ári tereńdetýge, ınvestıtsııa, energetıka, ónerkásip salalaryndaǵy qarym-qatynasty jandandyrýǵa, biryńǵaı kólik-logıstıka júıesin qalyptastyrýǵa qolaıly jaǵdaı jasalýda. Sońǵy jyldary óńirishilik saýda udaıy ósip, iskerlik baılanys keńeıe tústi. Birlesken kásiporyndar qurylyp, ortaq ınvestıtsııalyq jobalar iske asyrylýda. Sonymen qatar gýmanıtarlyq qarym-qatynasy jandana tústi. Mádenıet, bilim salalaryndaǵy, jastar arasyndaǵy yqpaldastyqtyń mazmuny baıyp keledi. Osy oń nátıjelerdiń barlyǵy baýyrlas halyqtarymyzdy odan ári jaqyndatýǵa, jáne aımaqtyń bedelin nyǵaıtýǵa yqpal etedi, – dedi Memleket basshysy.
Aıta keteıik, Prezıdent Qasym-Jomart Toqaev Ortalyq Azııa jáne Ázerbaıjan memleketteri basshylarynyń beıresmı Konsýltatıvtik kezdesýine qatysty.
