QR Prezıdenti medıtsına qyzmetkerlerin quttyqtady
ASTANA. KAZINFORM - Memleket basshysy Qasym-Jomart Toqaev el turǵyndaryn Medıtsına qyzmetkeri kúnimen quttyqtady.
Qurmetti dárigerler!
Qadirli densaýlyq saqtaý salasynyń qyzmetkerleri!
Kásibı merekelerińiz qutty bolsyn!
Sizder kún saıyn adam ómiri úshin kúresip, ult saýlyǵyn jaqsartýǵa ólsheýsiz zor úles qosyp kelesizder. Bul – óte jaýapty ári abyroıly mıssııa.
Densaýlyq saqtaý salasyn damytý, dárigerlerdi barynsha qoldaý – memlekettiń mańyzdy mindetiniń biri. Biz ózderińizdiń qajyrly eńbekterińizdi qashanda joǵary baǵalaımyz. Medıtsına qyzmetkerleriniń mártebesin kóterýge jáne olardyń quqyqtaryn qorǵaýǵa árdaıym basa nazar aýdaramyz. Jaqynda qabyldanǵan arnaıy zań – osynyń aıqyn dáleli. Sondaı-aq elimizde tuńǵysh ret «Qazaqstannyń eńbek sińirgen dárigeri» ataǵy belgilendi. Bul marapat halyqqa qaltqysyz qyzmet etken naǵyz maıtalman mamandarǵa beriledi.
Sizder «Adal azamat» tujyrymdamasynyń ıdealdary men qundylyqtaryn berik ustanyp, kásibı biliktilik pen antqa adaldyqtyń úlgisin kórsetip júrsizder.
Qoǵamnyń ıgiligi jolyndaǵy eseli eńbekterińiz úshin shynaıy rızashylyǵymdy bildiremin!
Barshańyzǵa myqty densaýlyq, baq-bereke, tolaıym tabys tileımin!