QR Prezıdenti Kıpr Respýblıkasynyń Syrtqy ister mınıstri Konstantınos Kombosty qabyldady
ASTANA. KAZINFORM - Memleket basshysy Kıpr Respýblıkasynyń Syrtqy ister mınıstri Konstantınos Kombosty qabyldady, dep habarlaıdy Aqordanyń baspasóz qyzmeti.
Kezdesýde Qasym-Jomart Toqaev Qazaqstannyń Kıpr Respýblıkasymen seriktestik qarym-qatynasty damytýǵa nıetti ekenin rastady. Memleket basshysy dıplomatııalyq qatynas ornaǵan 32 jyldyń ishinde elderimiz arasynda berik saıası dıalog pen ınvestııalyq yntymaqtastyq qalyptasqanyna nazar aýdardy.
Prezıdent Kıpr úkimetiniń Astana qalasynda elshilik ashý týraly sheshimin quptady.
Onyń aıtýynsha, bul qadam dıplomatııalyq baılanystardyń jańa kezeńine jol ashyp, ózara seriktestiktiń damýyna serpin beredi.
Óz kezeginde Konstantınos Kombos qonaqjaılyq tanytqany úshin rızashylyǵyn bildirip, Kıpr men Qazaqstan arasyndaǵy yntymaqtastyqty nyǵaıtýǵa zor múmkindik bar ekenin atap ótti.
Budan bólek, kezdesý barysynda saýda-ekonomıka, ınvestıtsııa, týrızm salalaryndaǵy yntymaqtastyqty nyǵaıtý perspektıvasy qarastyryldy. Buǵan qosa halyqaralyq jáne óńirlik kún tártibi, sonyń ishinde BUU men Eýropa Odaǵy aıasyndaǵy yqpaldastyq máseleleri talqylandy.
