QR Prezıdenti qatysatyn is-sharalarda ǵımarattyń talapqa saı bolýyna kim jaýapty
Prezıdenttiń Іs basqarýshysy Aıbek Dádebaev Memleket basshysynyń qatysýymen elimizde ótetin túrli deńgeıdegi is-sharalarda ǵımarattyń halyqaralyq hattamaǵa saı bakterıologııalyq jáne sanıtarlyq-hımııalyq talaptarǵa, sondaı-aq jaryq pen shý deńgeıiniń, tipti mıkroklımattyń normaǵa saı bolýyn kimder jáne qalaı qamtamasyz etetinin aıtty, dep habarlaıdy QazAqparat.
«Ózderińiz bilesizder, Prezıdenttiń Іs basqarmasyna júktelgen mańyzdy mindetterdiń biri – Memleket basshysynyń qatysýymen ótetin halyqaralyq jáne el ishindegi alqaly jıyndardy joǵary deńgeıde ótkizýge atsalysý, saqadaı saı daıyndyqty qamtamasyz etý.
Jyl basynan bizdiń irgeli ujym memleketter basshylarynyń kezdesýleri, Qazaqstanǵa shet elderden úkimet delegatsııalarynyń kelýi, merekelik saltanatty jıyndar, Úkimet pen Parlament ǵımarattarynda ótken keńeıtilgen otyrystar syndy júzden astam is-sharany uıymdastyrýǵa belsene qatysty.
Osy oraıda, jumysy kózge baıqala bermeıtin, biraq asa mańyzdy ról atqaratyn mekemelerdiń biri – Sanıtarlyq-epıdemıologııalyq saraptama ortalyǵynyń qyzmetine toqtalǵym kelip otyr. Ortalyq qyzmetkerleri jıyndar ótetin barlyq ǵımarattardyń ishinde halyqaralyq hattamaǵa saı bakterıologııalyq, sanıtarlyq-hımııalyq, toksıkologııalyq saraptama jasaıdy, jaryq pen shý deńgeıin, jalpy mıkroklımatty tekseredi», – deıdi A.Dádebaev.
Atalǵan mekeme Halyqaralyq zerthanalardy akkredıtteý qaýymdastyǵynyń (ILAK) tirkeýinen ótip, halyqaralyq zerthana mártebesin alǵan. Bul – joǵarǵy sapanyń kórsetkishi. Onyń zertteýleriniń nátıjesi ILAK uıymynda tirkelgen 137 eldiń barlyǵynda moıyndalatynyn bildiredi.
«Ortalyqtyń damý baǵytyndaǵy kezekti qadam – jyl sońyna deıin halyqaralyq referent mártebesin ıelený bolmaq. ıAǵnı, túrli zerthanalarda qaıshylyq týyndaǵan jaǵdaıda sońǵy sheshimdi atalǵan kásiporynnyń sanıtarlyq-hımııalyq zerthanasy shyǵaratyn bolady.
Prezıdenttiń Іs basqarmasy elimizdiń bedelin bıiktetý isinde erekshe orny bar kásiporynnyń materıaldyq-tehnıkalyq jaǵdaıyn jetildirip otyrýdy únemi nazarda ustaıdy.
Elimiz aman, eńbekkerlerimiz abyroıly bolsyn!», - dep túıindedi Prezıdenttiń Іs basqarýshysy.
