QR Prezıdenti Halyqaralyq Aral teńizin qutqarý qoryn qoldaýǵa kóbirek qarjy bólýge shaqyrdy
Memleket basshysy Qasym-Jomart Toqaev Klımat jónindegi dúnıejúzilik sammıtte sóılegen sózinde Halyqaralyq Aral teńizin qutqarý qoryn qoldaýǵa kóbirek qarjy bólýge shaqyrdy, dep habarlaıdy Kazinform Aqordanyń baspasóz qyzmetine silteme jasap.
«Mysaly, biz Halyqaralyq Aral teńizin qutqarý qoryn qoldaýǵa kóbirek qarjy bólýge shaqyramyz. Ózderińizge málim, bir kezderi Aral teńizi álemdegi tórtinshi iri ishki sý aıdyny bolǵan. Qazaqstan kelesi jyly Qorǵa tóraǵalyq etedi jáne osy máseleni sheshý úshin barlyq seriktesti jumyldyrýǵa úmittenedi. Budan bólek, BUU Bas Assambleıasynyń kelesi sessııasy sheńberinde «Birtutas sý» atty birinshi taqyryptyq sammıt ótedi. Biz Frantsııamen birge atalǵan jıynǵa teń tóraǵa bolatynymyzǵa qýanyshtymyz. Bıylǵy COP28 sammıtiniń tabysty ótkenin eskere otyryp, barlyq qatysýshy memleketti 2024 jyldyń maýsym aıynda uıymdastyrylatyn Astana halyqaralyq forýmyna qatysýǵa shaqyramyn. Forým klımatqa qatysty osy ótkir máseleler boıynsha maqsatty yntymaqtastyqty SOR29-ǵa deıin jalǵastyratyn dıalog alańy bola alady», -dedi Memleket basshysy.
Sondaı-aq Prezıdent Ortalyq Azııadaǵy klımatty qorǵaý jónindegi is-qımyldarǵa tyń serpin berý maqsatynda Qazaqstannyń BUU aıasynda 2026 jyly Qazaqstanda Óńirlik klımattyq sammıt ótkizýge sheshim qabyldaǵanyn atap ótti. Klımat jónindegi tótenshe jaǵdaı – jahandyq daǵdarys. Oǵan búkil álem bolyp tótep berý qajet.
«Bárimiz Jer sharyn saqtaýǵa jáne barshaǵa ortaq ornyqty damý maqsattaryn qamtamasyz etýge jaýaptymyz. Qazaqstan ujymdyq is-áreket pen yntymaqtastyqtyń arqasynda ǵana klımattyq daǵdarys problemasyn sheshe alatynymyzǵa kámil senedi»,-dedi Memleket basshysy.
