Toqaev Gvıneıa-Bısaý basshysyn Qazaqstanǵa kelýge shaqyrdy

ASTANA. KAZINFORM - Memleket basshysy Gvıneıa-Bısaý Prezıdentimen kezdesti, dep habarlaıdy Aqorda.

BUU klımattyń ózgerýi jónindegi 29-shy konferentsııasy aıasynda Qasym-Jomart Toqaev Gvıneıa-Bısaý Prezıdenti Ýmarý Sısoký Embalomen kezdesý ótkizdi.

 Prezıdent Gvıneıa-Bısaý elin Qazaqstannyń Afrıka qurlyǵyndaǵy mańyzdy seriktesteriniń biri retinde atap ótip, eki el arasyndaǵy dostyq baılanys pen ózara tıimdi yntymaqtastyqty nyǵaıtýǵa beıil ekenin rastady.

 Qasym-Jomart Toqaevtyń aıtýynsha, Qazaqstan – ashyq ári beıbit saıasat ustanatyn jáne aımaqtaǵy eń iri ekonomıkasy bar el. Sondaı-aq ol qos memlekettiń arasyndaǵy seriktestiktiń perspektıvasy mol dep sanaıdy.

Memleket basshysynyń pikirinshe, Qazaqstan men Gvıneıa-Bısaý geografııalyq turǵydan qashyq ornalasqanyna qaramastan, aýyl sharýashylyǵy, logıstıka jáne aqparattyq-kommýnıkatsııalyq tehnologııa salalarynda yqpaldastyqty damytýǵa múmkindigi bar.

Óz kezeginde Ýmarý Sısoký Embalo ekijaqty qarym-qatynastyń áleýetin talqylaýǵa múmkindik jasaǵany úshin Qazaqstan Prezıdentine alǵys aıtty.

 Kezdesý sońynda Qasym-Jomart Toqaev Ýmarý Sısoký Embalony ózine qolaıly ýaqytta Qazaqstanǵa resmı saparmen kelýge shaqyrdy.

Eske salaıyq, búgin Prezıdent Qasym-Jomart Toqaev Dúnıejúzilik klımat sammıtine qatysý úshin Bakýdegi olımpıadalyq stadıonǵa bardy. Sosyn Memleket basshysy Bakýdegi Dúnıejúzilik klımat sammıtinde sóz sóıledi. Klımattyń ózgerýi jónindegi BUU-nyń negizdemelik konventsııasyna qosylýshy taraptardyń 29-shy konferentsııasy aıasynda QR Prezıdenti Qasym-Jomart Toqaev Fınlıandııa Prezıdenti Aleksandr Stýbbpen kezdesý ótkizdi.