QR Prezıdenti eriktilerdi BUU-nyń qorshaǵan ortany qorǵaý bastamasyna qosylýǵa shaqyrdy

ASTANA. KAZINFORM - «Taza Qazaqstan» jalpyulttyq aktsııasy qorshaǵan ortany qalpyna keltirýge, ekologııalyq jaýapkershilik mádenıetin dáripteýge úles qosqysy keletin myńdaǵan azamatty biriktirdi. Bul joba BUU-nyń ornyqty damý salasyndaǵy jahandyq bastamalarymen úndesedi.

Bul týraly Prezıdent Qasym-Jomart Toqaev Birikken Ulttar Uıymy Bas Assambleıasynyń ornyqty damý maqsattaryna oraı Halyqaralyq eriktiler jylyn jarııalaýǵa arnalǵan sessııasyna joldaǵan úndeýinde aıtty.

-Osy oraıda Almaty qalasyn Birikken Ulttar Uıymynyń qoldaýymen halyqaralyq yntymaqtastyq habyna aınaldyrý nıetin quptaımyz. Ortalyq Azııa men Aýǵanstanǵa arnalǵan Ornyqty damý maqsattary jónindegi BUU Óńirlik ortalyǵynyń qurylýy osyndaı múmkindikke jol ashty,-dedi Prezıdent. 

Bul rette Almatyda BUU Eriktiler baǵdarlamasynyń sýbóńirlik keńsesiniń ashylýy Qazaqstannyń azamattyq belsendilikti jáne jahandyq seriktestikti damytýǵa beıil ekenin kórsetedi. 

Atalǵan bastamalar álemdegi syn-qaterlerdi birlesken kúsh-jiger men ózara senimniń arqasynda eńserýge bolatynyn rastaıdy. 

Barsha eldiń eriktilerin BUU-nyń qorshaǵan ortany qorǵaý, áleýmettik ıntegratsııa jáne jastardy qoldaý baǵytyndaǵy bastamalaryna qosylyp, ózara tájirıbe almasýǵa jáne birlesken jobalardy júzege asyrýǵa shaqyramyz. 

Qazaqstan BUU Eriktiler baǵdarlamasyna rızashylyǵyn bildiredi. Sonymen qatar jastardyń, áıelderdiń jáne shalǵaı aımaq turǵyndarynyń múmkindikterin keńeıtý úshin seriktestik aıasyn keńeıtýge úndeıdi. 

Bıyl Birikken Ulttar Uıymynyń qurylǵanyna 80 jyl toldy. Osy mańyzdy kezeńde barshańyzdy ádil ári jasyl álem qalyptastyrý jolynda yntymaq-birligimizdiń berik ekenin kórsetip, adamzat ıgiligi úshin birlesip áreket etýge shaqyramyn.

Qazaqstan aıtýly jyl aıasynda jáne odan keıingi kezeńderde de áleýmettik mańyzy bar eriktiler qyzmetin qoldaý úshin BUU-ǵa múshe barlyq memleketpen jáne azamattyq qoǵammen yntymaqtasa jumys isteýge árdaıym daıyn.