QR Prezıdenti densaýlyq saqtaý, oıyn bıznesine qatysty zańǵa qol qoıdy

ASTANA. KAZINFORM – Memleket basshysy «Qazaqstan Respýblıkasynyń keıbir zańnamalyq aktilerine densaýlyq saqtaý, oıyn bıznesi jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy, dep habarlaıdy Aqordanyń baspasóz qyzmeti.

Zańmen «Halyq densaýlyǵy jáne densaýlyq saqtaý júıesi týraly» kodekske, «Jarnama týraly», «Oıyn bıznesi týraly», «Mindetti áleýmettik medıtsınalyq saqtandyrý týraly» zańdarǵa túzetýler engizildi.

Túzetýlerdiń birinshi blogy densaýlyq saqtaý salasyndaǵy jekelegen máselelerdi sheshýge baǵyttalǵan.
Onkologııalyq aýrýlardy erte anyqtaýǵa arnalǵan skrınıngtik zertteýler kezinde ambýlatorııalyq jaǵdaıda beriletin mamandandyrylǵan medıtsınalyq kómek aıasyndaǵy zertteýler mindetti áleýmettik medıtsınalyq saqtandyrý júıesinen alynyp, memleket kepildik beretin medıtsınalyq kómektiń tegin kólemine engizilgen.

Birqatar túzetýler múgedektigi joq naýqastardy estý apparattarymen qamtamasyz etýdi kózdeıdi.

Ekinshi blokta býkmekerlik keńseler men totalızatorlardy uıaly baılanystyń abonenttik qurylǵylary, sondaı-aq onlaın-platformalar arqyly jarnamalaýǵa tyıym salynǵan.Sonymen qatar býkmekerlik keńseler men totalızatorlardy jarnamalaý ruqsat etilgen buqaralyq aqparat quraldarynyń sheńberi taryldy, olar endi tek sporttyq baǵytta bolýy kerek.

«Oıyn bıznesi týraly» Zańda bas bostandyǵyn shekteý túrindegi jaza boıynsha sottalǵan nemese shartty túrde sottalǵan adamdardyń qumar oıyndarǵa jáne (nemese) bás tigýge qatysýyna tyıym salý belgilengen.

Zańnyń mátini baspasózde jarııalanady.

Osyǵan deıin Atom energııasy jónindegi agenttik tóraǵasynyń orynbasarlary taǵaıyndalǵanyn jazdyq.