QR Prezıdenti Búkilqytaılyq komıtettiń tóraǵasymen kelissóz júrgizdi
Memleket basshysy Qytaıdyń Halyqtyq saıası konsýltatıvtik keńesi Búkilqytaılyq komıtetiniń tóraǵasy Van Hýnınmen kelissóz júrgizdi, dep habarlaıdy Kazinform Aqordanyń baspasóz qyzmetine silteme jasap.
Qasym-Jomart Toqaev Van Hýnınge iltıpat bildire otyryp, ony Qytaıdyń Halyqtyq saıası konsýltatıvtik keńesi Búkilqytaılyq komıtetiniń tóraǵasy laýazymyna saılanýymen quttyqtady.
Memleket basshysynyń aıtýynsha, qazaq-qytaı qatynastary máńgilik ári jan-jaqty strategııalyq seriktestiktiń joǵary deńgeıine jetti. Bul rette el basshylarynyń turaqty kezdesýleri eleýli ról atqardy. Óıtkeni kelissózder barysynda tatý kórshilik qarym-qatynas pen ózara tıimdi yntymaqtastyqty odan ári nyǵaıtý úshin negiz qalanady.
Qazaqstan Prezıdenti Qytaı Halyq Respýblıkasynyń áleýmettik-ekonomıkalyq progresine jáne Qytaı basshysy júrgizip otyrǵan tıimdi saıasattyń nátıjelerine joǵary baǵa berdi.
– Tóraǵa Sı Tszınpınniń kóregen, sarabdal saıasatynyń jáne onyń «Bir beldeý, bir jol» tujyrymdamasynyń tabysty júzege asyp jatqanyna kýá bolyp otyrmyz. Biz, álbette, Qytaıdyń jetistikterine qýanamyz. Búgin Tóraǵa Sı Tszınpın forým qatysýshylaryna «Eger Qytaıda bári jaqsa bolsa, barlyq memleket pen halyqtar úshin de jaıly bolady» degen sóz aıtty. Men bul pikirmen kelisemin. Sizdiń elińiz álemdegi ozyq ári jetekshi derjavaǵa aınalýdy kózdegen asqaq muratyna batyl qadam basyp keledi. Tóraǵa Sıdiń dana basshylyǵymen QHR Qytaı eliniń jańa dáýirleý kezeńinde jáne «Adamzattyń ortaq taǵdyry» kontseptsııasyn ilgeriletý isinde budan da keremet jetistikterge jetetinine senimdimin, – dedi Qasym-Jomart Toqaev.
Óz kezeginde Van Hýnın qazaq-qytaı qatynastaryna joǵary baǵa berdi.
– Sizdiń basshylyǵyńyzben Qazaqstannyń qarqyndy damyp, turmys deńgeıi udaıy joǵarylap keledi. Bul – tańǵalarlyq nátıje. Búgin Siz «Bir beldeý, bir jol» III forýmynyń ashylý rásiminde óte mazmundy sóz sóılep, yntymaqtastyqqa qatysty birqatar mańyzdy usynys aıttyńyz. «Bir beldeý, bir jol» aıasyndaǵy strategııalyq seriktestiktiń 10 jylynda barlyq taraptyń ortaq kúsh-jigeriniń arqasynda biz zor jetistikterge qol jetkizdik. Siz Sı Tszınpın myrzamen udaıy tyǵyz baılanysta bolyp, kóptegen kezdesý ótkizdińiz. Sonymen qatar sizder qazaq-qytaı qatynastarynyń jańa «altyn 30 jyldyǵyn» bastap berdińizder. Qytaı tarapy eki el basshylary qol jetkizgen mańyzdy ýaǵdalastyqtardy júzege asyrý jolyndaǵy yntymaqtastyqty birlese ilgeriletýge daıyn, – dep senim bildirdi Qytaıdyń Halyqtyq saıası konsýltatıvtik keńesi Búkilqytaılyq komıtetiniń tóraǵasy.
Sondaı-aq áńgimelesý barysynda eki elde júrgizilip jatqan jan-jaqty reformalar jóninde aıtyldy. Qasym-Jomart Toqaev pen Van Hýnın barlyq deńgeıdegi belsendi saıası dıalogty jalǵastyrý mańyzdy ekenin atap ótip, ekijaqty qarym-qatynastyń búkil baǵyty boıynsha yntymaqtastyqty nyǵaıtý perspektıvalaryn talqylady.
