QR Prezıdenti bıyl neshe ret sheteldik BAQ-qa suhbat berdi

ASTANA. KAZINFORM - Memleket basshysy bıyl otandyq jáne sheteldik BAQ-qa birneshe ret suhbat berip, elimizdiń ustanymyn bildire­tin maqalalaryn jarııalady. Bul týraly QR Prezıdentiniń keńesshisi – Baspasóz hatshysy Berik Ýálı Egemen Qazaqstan gazetinde jazdy. 

— Jyldyń alǵashqy kúnderi Memleket basshysynyń «Egemen Qazaqstan» gazetinde keń kólemdegi suhbaty jaryq kórdi. Onda Qańtar oqıǵasyna naqty baǵa berilip, el damýyndaǵy ózgerister qamtyldy.

Sondaı-aq Ázerbaıjannyń ARA, Armenııanyń «Armenpress», QHR-dyń «Sınhýa» aqparat agenttikterine jáne «Jenmın Jıbao» gazetine suhbattary, Frantsııanyń Le Figaro, Reseıdiń «Izvestııa» basylymdaryna maqalalary jarııalandy.

Bıyl Memleket basshysy eki ret jýrnalısterge arnap brıfıng ótkizip, BAQ ókilderiniń kókeıinde júrgen suraqtarǵa jaýap berdi. AES qurylysyna qatysty respýblıkalyq referendýmda daýys bergennen keıin Prezıdent otandyq buqaralyq aqparat quraldarynyń ókilderi úshin brıfıng ótkizdi. Al 7 jeltoqsan kúni Doha forýmynyń Newsmaker Interview formatyndaǵy paneldik sessııasy kezinde moderator, SNN jýrnalısi Djýlııa Chatterleıdiń suraqtaryna jaýap berdi.

Sondaı-aq Prezıdent shet memleketter basshylarymen birge BAQ ókilderine arnalǵan 14 brıfıng ótkizdi, - dep jazdy Berik Ýálı.

Sondaı-aq jyl basynan beri www.akorda.kz resmı saıtyna Memleket basshysy­nyń jumysy týraly, sonyń ishinde ártúrli is-sharalarda sóılegen sózde­ri men úndeýleri, Qazaqstan halqyna Joldaýy boıynsha 814 aqparat jarııalandy. Prezıdent Baspasóz qyzmetiniń negizgi platformasynyń biri – Aqorda telegram-arnasyna 7 804 aqparattyq materıal shyqsa, Baspasóz qyzmetiniń Facebook-tegi paraqshasyna 1 801 post, Instagram paraqshasyna 1 727 post jarııalandy.

— Memleket basshysynyń ózi de shetelge saparlary, qabyldaǵan sheshim­deri jaıynda áleýmettik jelilerdegi paraqshalaryna post jarııalap, olardyń mán-mazmunynan kópshilikti habardar etip otyrady. Bul halyqpen keri baılanystyń tıimdi quralyna aınalǵany sózsiz. Jyl basynan beri Prezıdent H-paraqshasyna 20 tvıt, al Instagram paraqshasyna 30 post jarııalady.

Áleýmettik jeliden bólek Memle­ket basshysynyń atyna kelip jatqan ótinish, aryz-shaǵymdar men talap-tilekterdi taldap, saralaý Prezıdent Ákimshiliginiń Ótinishterdi qaraýdy baqylaý bólimine júktelgen. Bıyl 26 jeltoqsandaǵy málimet boıynsha, dál osy platforma arqyly azamattardan 49 069 ótinish qabyldandy.

Bir jylda atqarylǵan aýqymdy sharýany bir maqalanyń sheńberin­de qamtyp shyǵý áste múmkin emes. Degenmen jurt jadynda saqtalǵan, memlekettiń damý tarıhynda ózindik orny bar oqıǵalardy osylaı saraptap óttik, - delingen maqalada.

Aıta keteıik, Berik Ýálı Memleket basshysy Qasym-Jomart Toqaevtyń jyl boıy atqarǵan qyzmetine sholý jasap, qoǵamdyq-saıası ómirdegi, áleýmettik-ekonomıkalyq damýdaǵy irgeli ózgerister men tabystar týraly baıandady.

Prezıdent bıyl jumys saparymen elimizdiń 11 óńirine bardy. Aımaqtardaǵy 60-tan asa óndiristik jáne áleýmettik-mádenı nysandarmen tanysyp, jurtshylyqpen kezdesti.