QR Prezıdenti Ázerbaıjan men Armenııa arasyndaǵy kelissózder protsesine qatysty málimdeme jasady
ASTANA. KAZINFORM – Aqordanyń baspasóz qyzmeti Prezıdent Qasym-Jomart Toqaevtyń Ázerbaıjan men Armenııa arasyndaǵy Almatyda ótetin kelissózder protsesine qatysty málimdemesin jarııalady.
«Qazaqstan tarapynyń usynysy boıynsha Ázerbaıjan Respýblıkasy men Armenııa Respýblıkasy arasyndaǵy beıbit kelisimge daıyndyq júrgizý maqsatynda eki eldiń syrtqy ister mınıstrleriniń kelissózin ótkizý týraly ózara kelisimge kelgenin quptaımyn.
Bul mańyzdy sharanyń Almatyda uıymdastyrylýynyń sımvoldyq máni bar. Óıtkeni 1991 jyly jeltoqsan aıynda TMD elderiniń táýelsiz damýyna negiz qalaǵan jáne memleketaralyq shekarany anyqtaý qaǵıdalaryn bekitken tarıhı qujatqa – Almaty deklaratsııasyna qol qoıylǵan edi.
Aldaǵy kezdesý ázerbaıjan-armıan ýaǵdalastyǵynyń naqty júzege asýyna jol ashyp, jýyq arada Ońtústik Kavkazda turaqty ári uzaqmerzimdi beıbitshiliktiń ornaýyna yqpal etedi»,-delingen qujatta.
