QR Prezıdenti AQSh-tyń Saýda ókili Ketrın Taıdy qabyldady
ASTANA. KAZINFORM – Memleket basshysy AQSh-tyń Saýda ókili Ketrın Taıdy qabyldady, dep habarlaıdy Aqordanyń baspasóz qyzmeti.
Prezıdent Qasym-Jomart Toqaev Ketrın Taıdyń sapary Qazaqstan men Amerıka Qurama Shtattary arasyndaǵy saýda-ekonomıkalyq yntymaqtastyqty keńeıtýde mańyzdy ról atqaratynyn atap ótti.
Memleket basshysynyń aıtýynsha, sońǵy otyz jylda eki el saýda, ınvestıtsııa, qaýipsizdik, adam quqyqtary jáne demokratııa sekildi kóptegen salada strategııalyq seriktestikti nyǵaıtty.
– Sizdiń elińiz – Qazaqstan ekonomıkasyndaǵy iri sheteldik ınvestorlardyń biri. Tikeleı sheteldik ınvestıtsııanyń jalpy kólemi 65 mıllıard dollardan asady. Byltyr eki memleket arasyndaǵy taýar aınalymy 4,1 mıllıard dollarǵa jetip, 30 paıyzdyq ósim kórsetti. Bul – rekordtyq kórsetkish. Qazirgi ýaqytta Qazaqstanda 600-den astam amerıkalyq kompanııa tabysty jumys istep jatyr. Men ınvestıtsııalyq tartymdylyqty jaqsartýǵa, ekonomıkany yryqtandyrýǵa jáne ónerkásipti damytýǵa basa mán beremin, – dedi Qasym-Jomart Toqaev.
AQSh-tyń Saýda ókili Ketrın Taı qurmet kórsetkeni úshin Memleket basshysyna alǵys aıtty. Sondaı-aq saýda baılanystaryn damytýǵa jáne ekonomıkalyq yqpaldastyqty nyǵaıtý úshin qajetti jaǵdaı jasaýǵa, sonyń ishinde Saýda jáne ınvestıtsııalar jónindegi negizdemelik kelisimdi júzege asyrýǵa qatysty jańa tásilderdi betpe-bet talqylaýǵa múmkindik bergenine rızashylyǵyn bildirdi.
