QR Prezıdenti Abu Dhabi Ports Group basshylyǵymen Aqtaý, Quryq porttaryn damytýdy talqylady
Memleket basshysy Qasym-Jomart Toqaev Abu Dhabi Ports Group kompanııasynyń basqarýshy dırektory Muhammed Jýmý ál-Shamısıdi qabyldady. Kazinform bul týraly Aqordaǵa silteme jasap habarlaıdy.
Kezdesý barysynda QR Prezıdenti Aqtaý jáne Quryq porttaryn damytýdy Qazaqstan strategııalyq maqsat etip otyrǵanyn atap ótti.
Qasym-Jomart Toqaev pen Muhammed Jýmý ál-Shamısı Abu Dhabi Ports Group kompanııasynyń kólik-logıstıka salasyndaǵy baı tájirıbesin eskere otyryp, osy saladaǵy ózara tıimdi qarym-qatynastyń perspektıvalaryn talqylady.
Memleket basshysy Qazaqstan munaıyn Orta dáliz arqyly Ázerbaıjanǵa tasymaldaý jónindegi «QazMunaıGaz» kompanııasy men ADP arasyndaǵy yntymaqtastyqty oń baǵalady.
Prezıdent Eýrazııany Shyǵanaqpen, Afrıkamen jáne Úndistanmen baılanystyratyn «Soltústik – Ońtústik» baǵdarynyń áleýetin paıdalaný jospary týraly aıtty. Onyń pikirinshe, 2027 jylǵa qaraı atalǵan baǵyttyń júk ótkizý qabileti keminde 70 paıyzǵa artyp, 9 mıllıon tonnadan 15 mıllıon tonnaǵa deıin ulǵaıýǵa tıis.
Osyǵan baılanysty Qasym-Jomart Toqaev «Qazaqstan temir joly» men ADP arasynda birlesken kásiporyn qurý jónindegi ýaǵdalastyqty erekshe atap ótip, bul jobalardyń tabysty júzege asyrylýyna tilektestik bildirdi.
