QR Premer-mınıstri Qazaqstannyń áıelder qaýymyn 8 naýryz merekesimen quttyqtady
ASTANA. KAZINFORM - QR Premer-mınıstri Oljas Bektenov Qazaqstannyń áıelder qaýymyn 8 naýryz Halyqaralyq áıelder kúnimen quttyqtady, dep habarlaıdy Úkimettiń baspasóz qyzmeti.
Aıaýly analar! Qurmetti arýlar! Sizderdi 8 naýryz – Halyqaralyq áıelder kúnimen shyn júrekten quttyqtaımyn!
Halqymyzda «Іzgilik ataýlynyń bári kúnniń nury men ananyń aq sútinen jaralǵan» degen danalyq sóz bar. Ana – ómirdiń ózegi, tirshiliktiń bastaý bulaǵy, sheksiz meıirimniń qaınary. Ár shańyraqtyń uıytqysy, jer betindegi jaqsylyq pen ádemiliktiń asyl táji – áıelder qaýymy ulaǵatty urpaq ósirip qana qoımaı, elge degen shynaıy janashyrlyqtyń úlgisin kórsetip keledi. Bilim berý men densaýlyq saqtaý, aýyl sharýashylyǵy men ónerkásip, bıznes pen sport, qoǵamdyq ómirdiń jáne basqa da san túrli salasynda júrgen aıaýly jandardyń eńbegi sheksiz qurmetke laıyq. Bul oraıda, Prezıdentimiz Qasym-Jomart Kemeluly Toqaev atap ótkendeı, otbasy ınstıtýtyn nyǵaıtý, áıelderdi qoldaý memlekettik saıasattyń asa mańyzdy basymdyǵy bolyp qala bermek.
Barshańyzǵa myqty densaýlyq, baqytty ǵumyr, eńbekterińizge tolaıym tabys tileımin.
Kóktemniń shýaqty kúnindeı sáýleli sátterińiz kóp bolsyn!
Osyǵan deıin Qasym-Jomart Toqaevtyń qazaqstandyq arýlardy 8 naýryz – Halyqaralyq áıelder kúnimen quttyqtaǵanyn jazdyq.