QR Premer-Mınıstriniń orynbasary shymkenttik kásipkerlermen kezdesti

ShYMKENT. QazAqparat - Úkimet basshysynyń orynbasary Gúlshara Ábdiqalyqova bastaǵan úkimettik top Shymkenttegi issapary aıasynda «Ońtústik» arnaıy ekonomıkalyq aımaǵyna bardy, dep habarlaıdy Shymkent qalasy ákiminiń baspasóz qyzmeti.

«Ońtústik» arnaıy ekonomıkalyq aımaǵynda Gúlshara Ábdiqalyqova «Alem BT»JShS, «LuxShoes» birlesken kásipornynda jáne «Bal tekstıl» fabrıkasynyń jumystarymen tanysty.

Aıta ketsek, arnaıy ekonomıkalyq aımaqta búginde 13 joba iske asqan. Investıtsııanyń jalpy quny - 29,5 mlrd. teńge. Nátıjesinde 1396 jumys orny ashylǵan. Olardyń 1227-sine boıynsha kópbalaly otbasylardyń ókilderi ornalastyryldy.

Budan soń vıtse-premer Shymkenttegi «Qaınar» bıznes ortalyǵynda qalanyń aýdan ákimderimen, kásiporyndar men mekeme basshylary jáne kásipkerlermen, kásipodaq uıymdarynyń ókilderimen kezdesip, áleýmettik áriptestikti damytý jáne áleýmettik jaýapkershilik máseleleri týrasynda jıyn ótkizdi.

Gúlshara Ábdiqalyqova Elbasynyń «Qazaqstan áleýmettik baǵyttardy basymdyqqa alý» tapsyrmasyn negizge ala otyryp, qoǵamda masyldyqqa, enjarlyqqa jol bermeý kerektigine toqtaldy. Bıznes qaýymdastyqtary men kásipkerlerge turmysy tómen otbasylaryna barynsha kómek kórsetý kerektigin aıtyp, olardyń túıtkildi máselelerin der kezinde sheshýde belsendi bolýǵa shaqyrdy.

Eske salsaq, Shymkentte halyqtyń áleýmettik osal toptaryn qoldaý maqsatynda 2019 jyly qalalyq bıýdjet qarajaty esebinen 100 ınvestıtsııalyq jobany iske asyrý josparlanǵan, onyń 30-y - turǵyn úı qurylysy, 15-i - bilim salasy, 36-y - ınjenerlik ınfraqurylymdardy jańǵyrtý, 19-y - kólik ınfraqurylymy boıynsha.

Olardy oryndaý nátıjesinde 22 myńnan astam jańa jumys orny ashylady. Sondaı-aq Shymkentte mamyr aıynda áleýmettik jaǵdaıy tómen 540 otbasyǵa páter berilmek. Onyń ishinde kópbalaly analarǵa 177 páter berý josparlanýda.