QR Premer-Mınıstriniń orynbasary Q. Kelimbetov Parlament Senatynda zeınetaqymen qamtý týraly zań jobasyn tanystyrdy
ASTANA. 2 mamyr. QazAqparat - Qazaqstan úkimeti úshin elimizdiń zeınetaqy júıesin jańǵyrtý sheńberinde áıelderdiń zeınetkerlik jasyn birte-birte kóterýden basqa jol joq, dep habarlady QR Premer-Mınıstriniń orynbasary Qaırat Kelimbetov.
«Esepteýler de, osy jasty 10 jyl ishinde kótermesek, oryn alatyn bıýdjettik shyǵyndar da bar. Biz Sizderge bárin de kórsetemiz. Qazir qabyldanýy tıis osy jalǵyz sheshim ekenine barlyǵymyz da kóz jetkizýimiz kerek. Árıne, bul áserli, emotsıonaldy sheshim. Talqylaý barysyn kórip júrmiz, biraq úkimette basqa jol joq, sondyqtan biz aldaryńyzǵa kelip, osy máseleni shuǵyl arada qarastyrýlaryńyzdy suraımyz», - dedi Q. Kelimbetov beısenbi kúni QR Parlament Senatynda zeınetaqymen qamtý týraly zań jobasynyń tanystyrylymynda depýtattarǵa qaratyp aıtqan sózinde.
«Qazirgi zeınetaqy júıesine qatysty suraqtar kóp. Búgingi aıtqandaryńyzdan narazylyqty sezdim. Búgingi zeınetaqy júıesiniń almastyrý koeffıtsıenti 40% ekenin moıyndaý kerek, bul halyqaralyq uıymdar moıyndaǵan normalar. Jáne búgin bir qıyndyq bar degenimiz, aldaǵanymyz bolar», - dedi ol.
Q. Kelimbetovtiń aıtýynsha, Qazaqstan halyq aldyndaǵy mindetterin halyqaralyq standarttar boıynsha oryndaıdy. «Másele kelesi on jyldyqtarda osyndaı deńgeıdi saqtaı alatynymyzda jatyr. Mine, sony saqtap qalý úshin osy reformalardy júrgizbekpiz. Olar aýyr bolsa da, asa qajet», - dedi ol.
Sonymen qatar, QR Parlament Senatynyń depýtaty Jumabek Tóregeldınov úkimet ókilderine áıelderdiń zeınetkerlik jasyn kóterýdi keıinge qaldyrý múmkindigi týraly suraq qoıdy.
«Zańdy qabyldaý keregin túsinemin, ásirese, jınaqtaýshy zeınetaqy qorlarynda jatqan qarjyny qutqaryp, olardy ıgi isterge paıdalaný úshin. Biraq áıelderdiń zeınetkerlik jasyn kóterý týraly bapty 2-3 jylǵa keıinge qaldyrýdy oıladyńyzdar ma? Ol ýaqytqa deıin jumys oryndaryn qurýǵa, asyqpaı jaqsylap daıyndalýdy», - dep surady ol.
