QR Premer-Mınıstriniń orynbasary Gúlshara Ábdiqalyqova Qyzylordaǵa keldi
QYZYLORDA. QazAqparat - Qazaqstan Respýblıkasy Premer-Mınıstriniń orynbasary Gúlshara Ábdiqalyqova jumys saparymen Qyzylorda oblysyna keldi, dep habarlaıdy QazAqparat tilshisi.
Gúlshara Ábdiqalyqova Syr óńirine saparynda birqatar mekeme jumysymen tanysyp, jergilikti turǵyndarmen júzdesedi dep josparlanǵan. Sondaı-aq, halyqty áleýmettik qorǵaý baǵytynda atqarylyp jatqan is-sharalaar barysymen tanysady.
QR Premer-Mınıstriniń orynbasary Qyzylordaǵa jasaǵan saparynda aldymen «Báıterek» shaǵyn aýdanyndaǵy az qamtylǵan kópbalaly otbasylarǵa arnalǵan «Balameken» jobasy negizinde salynatyn turǵyn úıler qurylysymen tanysady. Aıta keterligi, atalmysh aýmaqta az qamtylǵan jáne kópbalaly 150 otbasy oblystyq bıýdjet qarajaty men qaıyrymdylyq qorynyń kómegi arqasynda turǵyn úımen qamtamasyz etiletin bolady. Odan keıin Jappasbaı batyr kóshesinde az qamtylǵan jáne kópbalaly otbasymen júzdesedi.
Budan soń Gúlshara Ábdiqalyqova «Dostyq úıinde» jergilikti turǵyndarmen kezdesedi.
Kelesi kezekte túıirshiktelgen qurama jem shyǵarýmen aınalysatyn «Jan-Araı» JShS jumysymen tanysady dep josparlanyp otyr. Atalmysh mekeme ǵımaratynda qala, aýdan ákimderi, óndiris oryndary, bıznes qurylymdary, kásipodaq uıymdary basshylarymen kezdesedi dep kútilýde.
Budan keıin «Aqmeshit» kolledjinde Gúlshara Ábdiqalyqova Bilim jáne ǵylymdy damytý memlekettik baǵdarlamasyn Qyzylorda oblysynda júzege asyrý taqyryby boıynsha sala mamandarymen jınalys ótkizedi. Kelesi kezekte Qyzylorda qalalyq eńbekpen qamtý ortalyǵynda bolyp, jumyssyz jáne turmysy tómen azamattardan qujattar qabyldaý qyzmeti barysymen tanysady. «Nur Otan» partııasy oblystyq fılıalynda azamattardy qabyldaıdy.
