QR Premer-Mınıstriniń birinshi orynbasary Ómirzaq Shókeev Azıada júldegerlerimen kezdesti

Ó.Shókeevtiń qabyldaýyna shańǵyshylar Alekseı Poltoranın, Nıkolaı Chebotko, Sergeı Cherepanov, Evgenıı Velıchko jáne Svetlana Malahova, Elena Kolomına, Oksana ıAtskaıa, Anastasııa Slonova, sondaı-aq jattyqtyrýshylar quramynan Sergeı Tıshkov, Sergeı Snytın, A. Batıaıkın syndy jetekshi mamandar shaqyryldy. Azıadadaǵy jarqyn ónerleri úshin olardyń barlyǵyna 10 myń AQSh dollary kóleminde aqshalaı syılyq tabystaldy.

«Bizdiń quramanyń sheberleri ózderiniń eń úlken deńgeıdegi kásibılikterin kórsetti. Azıadadaǵy eń qyzyqty, tartymdy sport túrleriniń biri - shańǵy jarysy bolyp shyqty. Bizde bul sport túrinde 12 jıyntyq medal sarapqa salynǵan bolatyn. Onyń 6 altyn, 5 kúmis, 4 qola medalin bizdiń shańǵyshylar jeńip aldy. Osy nátıje Qazaqstan sportshylarynyń komandalyq eseptegi birinshi orynǵa shyǵýyna úlken úles qosty»,-dedi Ó.Shókeev.

Óz kezeginde jattyqtyrýshy Aleksandr Batıaıkın úlken qoldaý kórsetip kele jatqan federatsııa basshylyǵyna shańǵyshylar atynan alǵys bildirdi. «Sizderdiń úlken demeýlerińizdiń arqasynda biz halyqaralyq sportta joǵary bıikterge kóterildik, qazaqstandyq shańǵyshylardyń ataǵy jer jara bastady, básekege qabiletti ekendikterimizdi ózge elderdiń barlyq sportshylary jazbaı tanıdy»,-dedi ol.

Sonymen qatar, marapattaý rásimi aıaqtalǵannan keıin, federatsııa prezıdenti shańǵyshylardyń 21 aqpanda Oslodada jalaýy kóteriletin Álem chempıonatyna daıyndyǵy jóninde surady. Jattyqtyrýshy Aleksandr Batıaıkınniń aıtýynsha, Álem chempıonatynda el namysyn erler men áıelder arasynda alty-altydan 12 sportshy qorǵamaq. Onda da 15 shaqyrymdyq klassıkalyq júriste Alekseı Poltoranın men Nıkolaı Chebotkoǵa úmit artylyp otyrǵandyǵyn aıtty.