QR Premer-Mınıstrine Aqmola oblysyndaǵy jumyspen qamtýdyń nátıjeleri baıandaldy
ASTANA. QazAqparat - Búgin Aqmola oblysyna jumys sapary aıasynda QR Premer-Mınıstri Baqytjan Saǵyntaev Kókshetaý qalasynyń Jumyspen qamtý ortalyǵyn aralady jáne óńirdiń turǵyndaryn eńbekpen qamtýǵa járdemdesý sharalaryn qarady, dep habarlaıdy primeminister.kz .
Ortalyqty aralaý barysynda Baqytjan Saǵyntaev operatorlar jumys jasaıtyn operatsııalyq zaldy qarap shyqty. Óz kezeginde mekeme dırektory Erik Muratbekov óńir turǵyndaryna eńbekpen qamtýǵa kómek kórsetýdiń iske asyrylyp jatqan baǵdarlamalary týraly baıandama jasady.
2017 jyly ortalyqtyń járdemdesýimen 706 adam eńbekpen qamtyldy, 90-ǵa jýyq adam kásiptik oqytýdan ótti, 193 adam qoǵamdyq jumystarǵa, 51 adam - ýaqytsha áleýmettik jumys oryndaryna jáne taǵy 33 adam jastar is-tájirıbesine baǵyttaldy.
Aıtar bolsaq, Úkimet jumyspen qamtý máselesin turaqty baqylaýda ustaıdy. Jumys saparlary barysynda Baqytjan Saǵyntaev jergilikti atqarýshy organdardyń jáne bıznes ókilderiniń nazaryn jańa jumys oryndaryn, ásirese ekonomıka sektorlarynda qurý qajettiligine aýdartady, olar basqa salalardan áleýetti jumystan bosaǵan jumysshylardyń aǵymyn qabyldaı alady.
Sondaı-aq, 2017 jyldyń basynan bastap Qazaqstanda Ónimdi jumyspen qamtý jáne jappaı kásipkerlikti damytý jańa baǵdarlamasy iske asyrylýda, onda óz kásibin ashqysy keletin, nemese jumysqa turǵysy keletin adamdardy qoldaý boıynsha birqatar tetikter bar.
Aıta keterligi, 2017 jyldyń І toqsanynda Aqmola oblysynda 7 420 adam, onyń ishinde turaqty jumys oryndarymen - 4 055, ýaqytsha jáne maýsymdyq jumys oryndarymen - 3 162, qoǵamdyq jumyspen tólenetin jergilikti bıýdjet qarajaty esebinen - 2 066 adam jumyspen qamtyldy. Jumyssyzdyq deńgeıi 4,9% qurady.
Ónimdi jumyspen qamtý jáne jappaı kásipkerlikti damytý baǵdarlamasyn iske asyrýǵa óńirde 2017 jyly 4,8 mlrd teńge qarastyrylǵan.
