QR Premer-Mınıstri jumys saparymen ShQO-ǵa keldi
ASTANA. QazAqparat - QR Prezıdenti Nursultan Nazarbaevtyń tapsyrmasymen QR Premer-Mınıstri Baqytjan Saǵyntaev jumys saparymen Shyǵys Qazaqstan oblysyna keldi, dep habarlaıdy primeminister.kz.
Jumys sapary barysynda Premer-Mınıstr QR Prezıdentiniń «Qazaqstannyń úshinshi jańǵyrýy: jahandyq básekege qabilettilik» atty Joldaýynyń aımaqtaǵy iri ónerkásiptik-ındýstrıaldyq jáne aýyl sharýashylyǵy kásiporyndarynda, densaýlyq saqtaý jáne bilim berý nysandarynda júzege asyrylý barysymen tanysady.
Sondaı-aq, oblystyń áleýmettik-ekonomıkalyq damý máseleleri jóninde kásipkerlermen jáne qoǵam ókilderimen kezdesýi kútilýde.
Sonymen qatar, B.Saǵyntaev Halyqaralyq áýejaı men TETs-1 jylý qazandyǵynyń rekonstrýktsııalaný barysyn kóredi.
Baspasóz qyzmetiniń sońynan habarlaýynsha, QR Premer-Mınıstri Baqytjan Saǵyntaev Shyǵys Qazaqstan oblysyna jumys sapary barysynda álemdegi iri kásiporyndardyń birine aınalǵan Aqtoǵaı taý-ken baıytý kombınatynyń jumysymen tanysty.
B. Saǵyntaevqa nysan qurylysy men damýynyń negizgi kezeńderi týraly baıandaldy. Budan soń karerdiń sholý alańynda QR Premer-Mınıstrine ken alý tehnologııasy jaıly áńgimelendi, al sál keıinirek sýlfıd kenin qaıta óńdeıtin baıytý fabrıkasynda Premer-Mınıstrge kendi baıytý tehnologııasy tanystyryldy.
2016 jyly Indýstrııalandyrý kúni aıasynda Memleket basshysy Nursultan Nazarbaev iske qosqan totyqtandyrylǵan kennen mys óndirý boıynsha Aqtoǵaı kesheni jobalyq qýattylyǵyna shyǵaryldy. Bıylǵy jyldyń sońyna qaraı katodty mys óndirisi kólemin 20 myń tonnaǵa deıin jetkizý kózdelip otyr.
Aqtoǵaı taý-ken baıytý kombınaty KAZ Minerals Tobynyń jobasy bolyp tabylady, ol Shyǵys Qazaqstan oblysynyń Aıagóz aýdanynda attas kentke jaqyn ornalasqan ashyq túrdegi iri ken orny. Álemdegi ıgerilmegen eń iri mys ken oryndarynyń qataryna kiredi. Bul sońǵy bes jyldy alyp qaraǵandaǵy eń iri ındýstrıaldy qurylys.
