QR Premer-Mınıstri JEK naryǵynyń jumys jasaýyn qamtamasyz etý úshin birqatar tapsyrmalar berdi
ASTANA. QazAqparat - Búgin Úkimet úıinde QR Premer-Mınıstri Serik Ahmetov elimizde jańartylatyn energııa kózderin (JEK) qoldaý júıesin damytý máseleleri boıynsha keńes ótkizdi.
Keńes jumysyna birqatar múddeli ortalyq atqarýshy organdar men ulttyq kompanııalardyń basshylary qatysty, dep habarlady Premer-Mınıstrdiń baspasóz qyzmeti. QR qorshaǵan orta jáne sý resýrstary mınıstri Nurlan Qapparov JEK-ti qoldaý jáne Qazaqstanda atalǵan rynokty qalyptastyrýdyń júıeli sharalaryn usyndy. Memleket basshysynyń tapsyrmasy boıynsha mınıstrlik Eýropalyq Odaq memleketteriniń tájirıbesi zerdelenip, onyń ishinde birqatar elderde JEK sektoryn damytý barysynda jiberilgen kemshilikteri taldanǵan bolatyn.
Otyrysqa qatysýshylar usynylǵan zertteý nátıjeleri men eýropalyq sarapshylardyń usynystaryn talqylady.
Sonymen, jel, kún, bıogaz jáne gıdrostansalarda óndiriletin energııaǵa belgilenetin tarıfter boıynsha usynystar qaraldy. Bul tarıfter benchmarkıng negizinde, ıaǵnı JEK sektoryn damytyp jatqan elderdiń tájirıbesin baǵalaý jáne sol elderdegi «taza» elektr energııasy baǵalarymen salystyrý nátıjelerine súıenip belgilenip otyr.
N.Qapparovtyń aıtýynsha, 2014 jyly belgilenip, 15 jyl ózgermeı qoldanylatyn tarıfter jel elektr stansalaryna (JES) 1 kVt/saǵ úshin 19 teńge (nemese 9,5 eýrotsent shamasynda), kún elektr stansalary (KES) úshin - 29 teńge (shamamen 14,5 eýrotsent), shaǵyn gıdrostansalar (GES) úshin - 14 teńge (shamamen 7 eýrotsent) jáne bıogaz qurylǵylary (BGQ) úshin - 27 teńge (13,5 eýrotsent) deńgeıinde belgilenbek.
Budan basqa, 2020 jylǵa deıin JEK jobalaryn iske asyrýǵa lımıt belgileý usynystary qaraldy. Bul shekteýler JEK jobalaryn iske asyrýdy túr jaǵynan da, tutyný aýmaqtary jaǵynan da rettep, osy maqsattarǵa jer bólý jáne jelige qosý máselelerin sheshýge múmkindik beredi. Tutastaı alǵanda, usynylǵan lımıt jalpy belgilengen qýattylyqtyń 1850 MVt-yn qurap, onyń 1300 MVt-i - JES-qa, 500 MVt-i - KES-ke, 50 MVt-i - BGQ-qa bólinetin bolady.
Aımaqtar boıynsha lımıtter bylaısha bólinedi: JES boıynsha - 1050 MVt ortalyq aımaqqa, 250 MVt batys aımaqqa, KES boıynsha - 400 MVt ortalyq aımaqqa jáne 100 MVt batys aımaqqa, BGQ boıynsha - 40 MVt ortalyq aımaqqa jáne 10 MVt batys aımaqqa bólinedi, dep naqtylady QOSRM basshysy. Sondaı-aq, tarıfterdi jyl saıyn ınflıatsııa deńgeıine sáıkes ındeksteý máseleleri jáne elektr energııasyn satyp alý júıesiniń biryńǵaı satyp alýshysy - JEK-ti qoldaý jónindegi esepteý-qarjylyq ortalyǵynan júrgizilý sharalary talqylandy. Tutastaı alǵanda, Úkimet basshysy JEK-ti qoldaý júıesin, tarıfter kólemderiniń, lımıtteý joldaryn jáne iske asyrylý prıntsıpteri jobalaryn maquldady. Júıe aıtarlyqtaı kóp ınvestıtsııalar tartý men sondaı-aq sońǵy tutynýshylar úshin táýekelderdi azaıtýǵa baǵyttalǵan.
Máseleni talqylaý sońynda S.Ahmetov JEK rynogy jumysyn bastaý úshin Úkimet qaýlysynyń jobasyn engizýdi, sondaı-aq JEK-ti qoldaý boıynsha esepteý-qarjylyq ortalyǵynyń qyzmetin qamtamasyz etý, JEK túrleri boıynsha belgilengen lımıtterdi esepke alyp, jobalardy iske asyrý josparlaryna túzetýler engizý boıynsha birqatar tapsyrmalar berdi.
