QR Premer-Mınıstri transulttyq korporatsııalardyń ókilderimen ekijaqty kezdesý ótkizdi

ASTANA. QazAqparat - Baqytjan Saǵyntaev álemdik kompanııalardyń ókilderimen munaı-gaz jáne energetıka sektorlaryndaǵy yntymaqtastyqty damytý keleshegin talqylady, dep habarlaıdy primeminister.kz .

Sheteldik ınvestorlar keńesiniń 30-plenarlyq otyrysy aıasynda QR Premer-Mınıstri Baqytjan Saǵyntaev transulttyq korporatsııalardyń ókilderimen yntymaqtastyqty odan ári damytý máseleleri boıynsha birqatar ekijaqty kezdesýler ótkizdi.

Baqytjan Saǵyntaev «Lýkoıl» JAQ prezıdenti V. Alekperovpen, Cameco kanadalyq kompanııasynyń prezıdenti T. Gıttselmen, Royal Dutch Shell Plc bas atqarýshy dırektory B. Berdenmen, Exxon Mobil vıtse-prezıdenti M. Alberspen, «RÝSAL» BK bas dırektory V. Solovevpen, General Electric Oil&Gas bas dırektory L. Sımonellımen, ENI bas atqarýshy dırektory K. Deskaltsımen, «Polımetall» AAQ tóraǵasy I. Fınogenovpen, Eýropa, Afrıka jáne TMD elderi boıynsha Marubeni ókili N. Ivashıtamen kezdesti.

Kezdesýler barysynda munaı-gaz, energetıka, taý-ken óndirisi, metallýrgııa, sondaı-aq mashına jasaý salalarynda yntymaqtastyqty keńeıtý máseleleri talqylandy. Sondaı-aq, taraptar Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýy aıasynda tehnologııalyq jańarý men energııanyń jańǵyrtylatyn kózderin paıdalaný boıynsha jobalardy iske asyrý keleshegin qarady.