QR Premer-Mınıstri Syr óńirindegi saparynda aımaqtaǵy isterge oń baǵa berdi
QYZYLORDA. QazAqparat - Búgin Qyzylorda oblysynda jumys saparymen Qazaqstan Respýblıkasynyń Premer-Mınıstri Baqytjan Saǵyntaev bastaǵan Úkimettik delegatsııa boldy. Onyń quramynda QR Premer-Mınıstri Keńsesiniń basshysy, ınvestıtsııalar jáne damý, densaýlyq saqtaý, eńbek jáne halyqty áleýmettik qorǵaý, qarjy, mádenıet jáne sport, qorǵanys jáne aeroǵarysh ónerkásibi mınıstrleri, sondaı-aq, birqatar memlekettik organdardyń jáne damý ınstıtýttarynyń jetekshileri bar.
Oblys ákimi Qyrymbek Kósherbaev Úkimet basshysyn aımaqtyń áleýmettik-ekonomıkalyq damýy týraly qulaǵdar etti. Sonymen birge úkimettik delegatsııa óńirdiń biraqatar mańyzdy nysandaryn aralady.
Aldymen Qyzylorda sý torabynda bolǵan Úkimet músheleri Memleket basshysynyń tapsyrmasymen kóktemgi tasqyn sýdy jınaqtaý jáne sýarmaly jerlerdiń aýmaǵyn ulǵaıtý boıynsha atqarylyp jatqan jumystarmen tanysty. 
Aımaqtyń densaýlyq saqtaý jáne bilim berý júıesiniń damýymen QR Premer-Mınıstri 300 orynǵa arnalǵan oblystyq kópsalaly balalar aýrýhanasyn jáne «Nur-Shuǵyla 2» jekemenshik balabaqshasyn aralaý barysynda tanysty. Munan soń Úkimet basshysy búginde ártúrli baǵyttar boıynsha 289 túrli qyzmet túrin usynyp otyrǵan Kásipkerlerge qyzmet kórsetý ortalyǵynda boldy.
Jumys saparynyń aıasynda oblys ekonomıkasyn jańǵyrtý máselelerine arnalǵan jıyn ótti. Qyrymbek Kósherbaev aımaqta Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýynda belgilengen tapsyrmalardy júzege asyrý úshin barlyq kúsh-jiger jumyldyrylyp, negizgi salalardy tehnıkalyq qaıta jaraqtaý, eńbek ónimdiliginiń deńgeıin arttyrý, básekege qabiletti eksporttyq ónimdi damytý sharalary qolǵa alynyp jatqanyn atap ótti.
«Óńdeý sektoryndaǵy óndiris kólemi 9,4%-ǵa ósti, bul respýblıkanyń ortasha kórsetkishinen joǵary. Memleket basshysynyń tehnologııalyq damýdy jedeldetý jónindegi tapsyrmasy boıynsha oblysta ındýstrııalandyrý baǵdarlamasy aıasynda 6 kásiporyn gazdy paıdaǵa jaratatyn, elektr energııasyn óndiretin, kúkirt qyshqylyn shyǵaratyn jáne sút óńdeıtin jańa tehnologııalyq qondyrǵylardy iske qosty. Máselen, «Aral tuz» AQ kásiporny ıspandyq jańa tehnologııa boıynsha jumys atqarýda. Bul eksport kólemin 40 ese ulǵaıtýǵa múmkindik berdi. Sońǵy 2 jylda kásiporyn Reseıdiń as tuzy naryǵynyń 12%-yna ıe boldy», - dedi Qyrymbek Kósherbaev.
Oblys ákiminiń aıtýynsha bıyl aımaqta eksportqa baǵyttalǵan eki birdeı kásiporyndy iske qosý josparlanýda. Olar - molıbden úsh totyǵyn óndiretin kásiporyn jáne shyny zaýyty. Atap óterligi, molıbden totyǵy tolyqtaı Japonııaǵa eksportqa jóneltiledi. Al, shyny zaýyty boıynsha ınvestorlar qazirdiń ózinde jobanyń ekinshi kezeńin: kún batareıalaryna, smartfondar men planshetterge arnalǵan ýltra jińishke shyny shyǵarýdy talqylaýda. 
Sonymen qatar, Baqytjan Saǵyntaevqa Qyzylorda qalasy Syrdarııa ózeniniń sol jaq jaǵalaýyndaǵy qurylys jobasy tanystyryldy. Bul jerde 18 kópqabatty (778 páter) turǵyn úıden turatyn alǵashqy móltek aýdannyń, 320 oryndyq balabaqshanyń jáne basqa da nysandardyń qurylysy qarqyndy júrip jatyr.
Tústen keıin QR Premer-Mınıstri Jańaqorǵan aýdanyndaǵy «Shalqııa» qorǵasyn-myrysh ken ornyna baryp, shahtaǵa túsip, kenishti qaıta jańǵyrtý jumystarynyń barysymen, onyń damý perspektıvasymen, sondaı-aq, taý-ken baıytý kombınaty qurylysynyń bastalýymen tanysty. Ken ornynda «Taý-Ken Samuryq» AQ men Eýropalyq qaıta qurý jáne damý banki (EQDB) arasynda taý-ken baıytý kombınatynyń qurylysyn qarjylandyrý jónindegi kelisimge qol qoıyldy. 1500 jumys ornyn qurýǵa múmkindik beretin bul kásiporyn 2018 jyly iske qosylady dep josparlanǵan. Munan bólek, taý-ken baıytý kombınaty 2018 jyldan bastap 2 mln. tonnaǵa deıin, al 2019 jyly 4 mln tonnaǵa deıin ken óńdeıdi dep kútilýde.
Sapar barysyndaǵy kelesi nysan - Jańaqorǵan aýdanyndaǵy ejelgi Syǵanaq (VІ-HІH ǵ.ǵ) qalashyǵy boldy. Baqytjan Saǵyntaev «Mádenı mura» memlekettik baǵdarlamasy aıasynda 2003 jyldan beri júrgizilip jatqan qazba jáne qaıta qalpyna keltirý jumystaryn kórdi. Al, 2014 jyldan bastap mundaǵy arheologııalyq zertteýler oblys bıýdjeti esebinen júrgizilýde. Osy jerde Úkimet basshysy shyǵarmashylyq zııaly qaýym ókilderimen júzdesti.
Sapar qorytyndysy boıynsha Baqytjan Saǵyntaev munaı óndirý kóleminiń azaıǵanyna qaramastan aımaqta óńdeý ónerkásibi, aýyl sharýashylyǵy, jappaı orta bıznes belsendi damyp, áleýmettik sala men turǵyn úı qurylysy bárinen de kóp qarjylandyrylyp otyrǵanyn atap ótti. 
