QR Premer-Mınıstri «Sheremetevo» áýejaıyndaǵy oqıǵaǵa baılanysty kóńil aıtty
NUR-SULTAN. QazAqparat - Qazaqstan Respýblıkasynyń Premer-Mınıstri Asqar Mamın Reseı Federatsııasy Úkimetiniń Tóraǵasy Dmıtrıı Medvedevke Máskeý qalasyndaǵy «Sheremetevo» áýejaıyna ushaqtyń apatty qonýy saldarynan adamdardyń qaza tabýyna baılanysty kóńil aıtý jedelhatyn joldady, dep habarlaıdy primeminister.kz.
«Qazaqstan Respýblıkasy Úkimetiniń atynan jáne ózimniń atymnan qaza tapqandardyń jaqyndary men týystaryna qaıǵyryp kóńil aıtamyn, sondaı-aq zardap shekkenderdiń tezirek saýyǵyp ketýlerin tileımin», - delingen Úkimettik jedelhat mátininde.
Reseıdiń Sheremetevo áýejaıynda bolǵan ushaq apaty jóninde buǵan deıin habarlaǵan bolatynbyz. Órtengen Sukhoi Superjet 100 ushaǵynyń bortynda bolǵan 78 adamnyń 37-si ǵana aman qaldy. QR SІM zardap shekken jáne qurban bolǵandar arasynda qazaqstandyqtardyń bar-joǵyn tekserip jatyr.
QR Indýstrııa jáne ınfraqurylymdyq damý mınıstri Roman Sklıardyń aıtýynsha, Qazaqstanda Reseıde óndirilgen «SSJ-100» markaly bir ǵana bıznes ushaq paıdalanylady.
«Bul ushaq jekemenshik kompanııaǵa tirkelgen. Al turaqty baǵdarlarda bizde osy tıptegi áýe kemesi paıdalanylyp júrgen joq», - dedi mınıstr.
