QR Premer-Mınıstri Serik Ahmetov «Agrobıznes-2020» baǵdarlamasy aıasynda aýyl sharýashylyǵy ónimderin óńdeý baǵytyn kúsheıtýdi tapsyrdy
ASTANA. 23 tamyz. QazAqparat - Úkimet úıinde QR Premer-Mınıstri Serik Ahmetovtiń tóraǵalyǵymen selektorlyq rejımde ótken keńeste elimizdiń agroónerkásiptik keshenin odan ári damytý máseleleri talqylandy, dep jazady primeminister.kz.
Jıynǵa memlekettik organdar, iri aýyl sharýashylyǵy qurylymdary, agrarlyq qaýymdastyqtar men odaqtardyń basshylary, ǵylymı orta ókilderi qatysty.
Úkimet basshysy AÓK damytýdyń jańa baǵdarlamasyn júzege asyrý boıynsha jumystar bekitilgen josparlar sheńberinde júrgizilip jatqanyn atap ótti. Ol 2013 jyl qoldanystaǵy zańnamaǵa tıisti ózgerister engizilgennen keıin, 2014 jyldan bastap qoldanysqa enetin zaımdardy kepildendirý men saqtandyrý, ınvestıtsııalyq sýbsıdııalaý, satyp alý baǵasyn kepildendirý sııaqty jańa memlekettik qoldaý mehanızmderin iske qosý men uıymdastyrý jyly bolyp tabylatynyn atap kórsetti.
Salanyń búgingi jaǵdaıy men jańa «Agrobıznes-2020» salalyq baǵdarlamasynyń oryndalý barysy, jáne ony júzege asyrýdyń tetikteri týraly Aýyl sharýashylyǵy mınıstri Asyljan Mamytbekov baıandady. Atap aıtqanda, «AÓK-ti memlekettik qoldaý kólemin 4,5 esege arttyrý qarastyrylýda, salany damytý jobasyn júzege asyrý kezeńinde 10 trln. teńgeden kem emes jeke qarjy tartylatyn bolady»,-dedi ol.
Baǵdarlamanyń negizgi maqsatty ındıkatorlarynyń ishinde, qarjylyq saýyqtyrý, AÓK sýbektileri úshin taýarlar, jumystar men kórsetiletin qyzmet túrleri qoljetimdiligin arttyrý, salany memlekettik retteý júıesiniń tıimdiligin kóterý sııaqty kórsetkishter bar.
A.Mamytbekovtyń sózine qaraǵanda, «qarjylyq saýyqtyrý úshin Mınıstrlik AÓK sýbektileriniń nesıelik jáne lızıngtik mindettemeleri boıynsha syıaqy mólsherlemesin sýbsıdııalaý erejesin bekitken, jergilikti jerlerde túsindirý jumystary júrgizilip, anyqtama alý úshin sall-centr (tel. 8 800 080 7080) ashylǵan». Mınıstr sondaı-aq memlekettik qoldaýdyń jańa tetikteri qatarynda zaımdardy kepildendirý men saqtandyrý, sýbsıdııalaý erejelerin ózgertý, normatıvtik-quqyqtyq bazany jetildirýdi atady.
Mınıstr sonymen qatar, veterınarlyq qaýypsizdikti qamtamasyz etý, AÓK salasyndaǵy kórsetiletin memlekettik qyzmetterdi damytý sharalary týraly habarlady. «On bir qyzmet kórsetý túrin avtomattandyrý josparlanýda, sonyń nátıjesinde qyzmet kórsetýdiń normatıvtik merzimi 60-tan 15 jumys kúnine deıin nemese 25%-ǵa, qujattardyń normatıvtik sany 12-den 4 qujatqa deıin nemese 33%-ǵa qysqaratyn bolady», - dedi A.Mamytbekov.
Onyń aıtýynsha, kórsetkishteri jyldarǵa jáne oblystar arasyna arnalyp bólingen aýyl sharýashylyǵynyń árbir qosalqy salasyn damytý boıynsha 15 sheberlik-josparlary daıyndalǵan. Qujattar oblys ákimshilikterine kelisilýge jiberilgen.
Keńeste sondaı-aq «Ivolga-Holdıng» JShS basshysy V.Rozınov, «Zarechnoe» JShS basshysy V.Dvýrechenskıı, «Ijevskoe» ÓK basshysy I.Janǵorazov, «Aktep» Sh.Saǵnalıev, «Turar» Q.Ospanov, «Prokop» G.Prokop, «Qazaqstan qus ósirýshileri odaǵy» zańdy tulǵalar birlestiginiń basshysy R.Sháripov, «Qazaq maqta qaýymdastyǵy» zańdy tulǵalar birlestiginiń tóraǵasy S.Baqtybaev, «Qazaqstan fermerler odaǵy» vıtse-prezıdenti A.Ábdiqalymov, QR Ulttyq ǵylym akademııasynyń akademıgi Ǵ.Qalıev sóıledi.
Keńes sońynda, Úkimet basshysy «Agrobıznes-2020» baǵdarlamasynyń Qazaqstannyń aýyl sharýashylyǵy salasynyń júıeli damýy úshin mańyzynyń zor ekenine toqtalyp, Baǵdarlama jobasynyń aýyl sharýashylyǵy taýar óndirýshileri jáne agrarlyq qoǵamdastyq ókilderiniń qatysýymen bir jyl boıyna talqylanǵanyn jáne onyń Memleket basshysy tarapynan qoldaý tapqanyn atap kórsetti.
«Úkimetke AÓK-ti damytý máseleleri boıynsha, bul salamen aınalysatyn, kásibı mamandardyń árqaısynyń pikirin bilý mańyzdy. Búgin qyzyqty usynystar aıtyldy, biz ony qarap, tıisti sharalar qabyldaıtyn bolamyz», - dep túıindedi Premer-Mınıstr.
Úkimet basshysy birqatar usynystar men eskertýlerge túsinik bere otyryp, aýyl sharýashylyǵy ónimderin qaıta óńdeýdi damytý máselelerine nazar aýdartty. Osy oraıda S.Ahmetov «AÓK-tegi iri bıznes qaıta óńdeý salasyn óz qanatynyń astyna alýy kerek dep esepteımin», deı kele, bul úshin qajetti jaǵdaılardyń bári jasalýda, olar agroónerkásiptik óndiristiń kóptegen perspektıvalyq baǵyttaryn qamtıtyn baǵdarlamada jazylǵanyn atap aıtty.
Premer-Mınıstr AShM-ge aıtylǵan usynystardyń bárin Baǵdarlamany júzege asyrý tetikterine naqty enetindeı qylyp qorytyp, taldaýdy tapsyra kele, onyń tabysty júzege asyrylatynyna, tutastaı alǵanda elimizdiń agroónerkásiptik kesheniniń nyǵaıa túsetinine senim bildirdi.
