QR Premer-Mınıstri Saraptama keńesiniń otyrysyn ótkizdi
ASTANA. QazAqparat - Búgin Úkimet úıinde Qazaqstan Respýblıkasynyń Premer-Mınıstri Baqytjan Saǵyntaevtyń tóraǵalyǵymen Ekonomıka jónindegi saraptama keńesiniń kezekti otyrysy ótti, dep habarlaıdy primeminister.kz.
Otyrys barysynda Memleket basshysynyń iskerlik ahýaldy jaqsartýǵa, ákimshilik kedergilerdi azaıtýǵa jáne bıznes-protsesterge azamattardyń qatysýyn keńeıtýge baǵyttalǵan saıasatyn iske asyrý máseleleri talqylandy. Atap aıtqanda, básekeli ortaǵa memleketke tıisti emes fýnktsııalardy berý tetikteri qaraldy.
«Qazaq munaı jáne gaz ınstıtýty» AQ bas dırektorynyń keńesshisi J. Kúlekeev jáne QR Ulttyq ekonomıka mınıstri T. Súleımenov eldegi ózin-ózi retteý ınstıtýtynyń qazirgi jaǵdaıy men ony damytý perspektıvalary týraly baıandamalarymen tanystyrdy. Talqylaýǵa QR Premer-Mınıstriniń orynbasary E. Dosaev, «Sentrans» AQ dırektorlar keńesiniń tóraǵasy E. Ábdirazaqov, «Rakýrs» ekonomıkalyq taldaý ortalyǵy» qoǵamdyq qorynyń dırektory O. Jandosov, «Oil Gas Project» JShS dırektory J. Ahmetov, «Qazaqstannyń halyq banki» AQ basqarma tóraǵasy Ú. Shaıahmetova, «Qoǵamdyq máselelerdi taldaý ortalyǵy» qoǵamdyq qorynyń dırektory M. Mahmutova, táýelsiz sarapshy D. Sádýaqasov qatysty.
Aıta keterligi, 2015 jyldyń 12 qarashasynda Qazaqstan Respýblıkasynyń «Ózin-ózi retteý týraly» zańy qabyldandy, ol ÓRU qyzmetterin retteý shegin anyqtady.
2000 - 2016 jyldary básekeli ortaǵa memlekettik organdardyń 28 fýnktsııasy ótkizildi.
