QR Premer-Mınıstri «Samuryq-Qazyna» UÁQ-yna baǵdarlamany jetildirý jónindegi qujattar jınaǵyn ázirleýdi tapsyrdy

ASTANA. 6 jeltoqsan. QazAqparat - Búgin Úkimet úıinde QR  Premer-Mınıstri  Serik Ahmetov ótkizgen májiliste «Halyqtyq IPO» baǵdarlamasy sheńberinde «QazTransOıl» AQ aktsııalaryn satyp alýǵa berilgen tapsyrystardy jınaýdyń qorytyndysy talqylandy

 jáne Úkimet basshysy «Samuryq-Qazyna» UÁQ-yna «Halyqtyq IPO» baǵdarlamasynyń kelesi kezeńin júzege asyrýǵa daıyndyq jumystaryn jandandyrýdy tapsyrdy. Bul týraly QR Úkimeti basshysynyń resmı saıtynda habarlandy.

«Keshe, 5 jeltoqsanda, osydan týra bir aı buryn bastalǵan tapsyrys jınaý aıaqtaldy. «Halyqtyq IPO» baǵdarlamasy boıynsha  QazTransOıl» AQ aktsııalaryn ornalastyrýdyń qorytyndylary onyń ájeptáýir tabyspen ótkenin aıǵaqtaıdy.  El-jurttan jáne ZJQ-nan jınalǵan tapsyrystardyń jalpy kólemi 56 mlrd. teńgeni quraıdy, al ornalastyrýdyń eń joǵary mólsheri 28 mlrd. teńge bolady dep kútilgen bolatyn. ıAǵnı, suranys usynystan eki ese asyp tústi», - dep habarlady «Samuryq-Qazyna» UÁQ basshysy Ómirzaq Shókeev.

Onyń aıtýynsha, zeınetaqy qorlary men market-meıkerler 37,3 mlrd. teńgege tapsyrys bergen, jeke tulǵalardan 25 myńnan astam tapsyrys túsken. «Búgin tapsyrystardyń qalǵan bóligi óńdelýde. Biz jeke tulǵalardan 18,6 mlrd. teńgeniń 30 myńnan astam tapsyrystary bolady dep oılaımyz», - dep qosty Ó.Shókeev.

Qor basshysy baǵdarlamanyń maqsaty elimizdiń barlyq azamattaryna jumys tájirıbesi men turǵylyqty jerine qaramastan teńdeı múmkindik berýdi qarastyrý ekenin atap ótti.

«Memleket basshysynyń «Halyqtyq IPO» baǵdarlamasy boıynsha Úkimetke bergen tapsyrmasy tabysty júzege asyryldy deýge bolady. Biz el azamattarynyń, jınaqtaýshy zeınetaqy qorlarynyń asqan qyzyǵýshylyq tanytqanyn kórip otyrmyz, sondyqtan biz óz kezegimizde osy baǵdarlamany odan ári tıimdi júzege asyrý úshin bar kúsh-jigerimizdi salamyz», - dep túıindedi ol.

Óz kezeginde, S.Ahmetov «Halyqtyq IPO» baǵdarlamasynyń tabysty bastalýy halyqtyń ulttyq kompanııalarǵa, «Samuryq-Qazyna» UÁQ-na,  jalpy ókimetke, Úkimetke jáne Elbasynyń joldaýlaryna senetinine dálel ekenin atap aıtty.    

Úkimet basshysy «Samuryq-Qazyna» UÁQ-na baǵdarlamany jetildirý jónindegi qujattar jınaǵyn ázirleýdi jáne  «Halyqtyq IPO» baǵdarlamasynyń kelesi kezeńin júzege asyrýǵa daıyndyq jumystaryn jandandyrýdy tapsyrdy.