QR Premer-Mınıstri «Samuryq-Qazyna» UÁQ Dırektorlar keńesiniń otyrysyn ótkizdi

ASTANA. QazAqparat - QR Premer-Mınıstri Kárim Másimov «Samuryq-Qazyna» Ulttyq ál-aýqat qorynyń Dırektorlar keńesiniń otyrysyn ótkizdi, onyń nátıjesinde QR Parlamentinde bıyl kúzde qoǵamdyq tyńdaý josparlanǵan. Bul týraly Úkimet basshysy óziniń Týıtterdegi akkaýntynda málim etti.

«Samuryq-Qazyna» Dırektorlar keńesiniń otyrysyn ótkizdim. Bıyl kúzde Parlamentte qoǵamdyq tyńdaý ótkizý kerek», - dep bólisti jazbasymen QR Premer-Mınıstri Kárim Másimov óziniń Týıtterdegi akkaýntynda.

Esterińizge salsaq, «Samuryq-Qazyna» UÁQ transformatsııalaý baǵdarlamasy 2014 jyldan bastap júzege asyrylady jáne qor men onymen baqylanatyn kompanııalardyń qyzmetin reformalaý qarastyrylǵan, dep jazady pm.kz saıty.

Transformatsııalaý úsh baǵyt boıynsha júrgiziledi: qorjyn kompanııalardyń qunyn arttyrý, qorjyn qurylymynyń jáne ınvestıtsııalyq qyzmetti júrgizýge Qor tásildemesiniń ózgerýi, Qordy jáne onyń qorjyn kompanııalaryn basqarý júıesine ókilettikterdi jáne jaýapkershilikti qaıta bólý.

Baǵdarlamany júzege asyrý nátıjesinde qordyń jáne onyń kompanııalarynyń básekege qabilettiligi artady, eńbek ónimdiligi ósedi, qarjy jáne operatsııalyq kórsetkishter jaqsarady.

Aıta ketken jón, Transformatsııalaý baǵdarlamasynyń birinshi kezeńi 2017 jyldyń sońyna deıin aıaqtalady.