QR Premer-mınıstri reseılik teńiz porttaryndaǵy dıskrımınatsııa máselesin úkimetaralyq keńeste taǵy kótermekshi
ASTANA. QazAqparat - Úkimettiń búgingi otyrysynda Premer-mınıstr Baqytjan Saǵyntaev Bishkek qalasynda ótetin Eýrazııalyq úkimetaralyq keńestiń kún tártibine reseılik teńiz porttaryndaǵy dıskrımınatsııa máselesin engizýdi tapsyrdy, dep xabarlaıdy QazAqparat tilshisi.
«Reseıdiń teńiz porttaryna shyǵý máselesin biz kópten beri pysyqtap kelemiz. Ony san alýan kezedesýlerde talqyladyq. Bishkekte (Eýrazııalyq úkimetaralyq keńesiniń otyrysynda) ony taǵy da qarastyrýǵa daıynbyz. Asqar Uzaqbaıuly, tıisti xatty ázirleńiz. Buny qaıtadan kún tártibine engizý kerek. Biraq ótken jyly Reseı Federatsııasynyń premer-mınıstri tıisti qaýlynyń jobasyn ázirleýdi tapsyrǵan bolatyn. Olar osy máseleni sheship, ótken jyldyń qyrkúıek-qazan aılarynda qujat qabyldaýǵa tıis edi. Jaraıdy, oǵan qaıtyp oralaıyq. Negizi, bul jerde birqatar daýly máseleler bar. Sony retke keltirgen jón», - deıdi Saǵyntaev.
Aıta keteıik, búgingi otyrys barysynda QR Energetıka mınıstri Qanat Bozymbaev Qazaqstan kómiriniń eksporty úshin EAEO-ǵa múshe memleketter aýmaǵyndaǵy teńiz porttary qyzmetterine teńdeı qoljetimdilik máselesin kóterdi . «Qazaqstandyq kómir óndirýshi kompanııalar Reseı Federatsııasy teńiz porttary operatorlarynyń qyzmetterine qoljetimdilik kedergilerine tap boldy. Kedergiler barshylyq, barlyq operator kompanııalar bul máseleni baqylaýda ustap tur», - dedi ol.
