QR Premer-Mınıstri Perýashevtyń dárethanasy ortaq jataqhana salý týraly saýalyna jaýap berdi
ASTANA. QazAqparat - Qazaqstan Premer-mınıstri Baqytjan Saǵyntaev Azat Perýashevtyń «Nurly jer» turǵyn úı-qurylys baǵdarlamasynyń aıasynda aýyl jastary úshin Astana, Almaty qalalary jáne oblys ortalyqtarynda dárethanasy, ashanasy ortaq jataqhanalar salý týraly depýtattyq saýalyna jaýap berdi, dep habarlady «QazAqparat» HAA.
«(...) Jappaı jataqhana salýdyń teris jaqtary da bar. Jeke ashana, dárethanasyz jataqhana turaqty jáne uzaq turýǵa qolaısyz. Bundaı ǵımarattyń negizgi kemshiligi jalpy qoldanatyn dýsh, dárethana, ashanalardyń sanıtarlyq jaǵdaıynyń nasharlyǵy, adam kóptigine baılanysty tynyshtyqtyń saqtalmaýy», - dedi jaýapta Premer-mınıstr.
Sondaı-aq, onyń aıtýynsha, qurylysqa salynǵan qarajattyń qaıtymdylyǵyn qamtamasyz ete almaıtyndyǵyna baılanysty bul joba memlekettik bıýdjetke salmaq salady.
«Osylaısha úıge muqtaj adamdar suranysynyń artýy, memlekettik bıýdjettiń shekteýli múmkindigin eskerip, qalaǵa kelgen aýyl jastaryna jataqhana salýǵa qarajat bólý týraly aıtý áli erte dep sanaımyn», - delingen jaýapta.
Eske salsaq, Májiliste «Aq jol» fraktsııasy Úkimetke «Nurly jer» turǵyn úı-qurylys baǵdarlamasyna tıesili qarjydn aqsha bólip, aýyl jastary úshin jekeshelendirý quqyǵynsyz uzaqmerzimge jalǵa beriletin dálizdik túrdegi jataqhana salýdy engizý týraly máseleni qaraýdy usynǵan edi.
