QR Premer-mınıstri «Paryz» syılyǵyn tabystady (FOTO)
ASTANA. QazAqparat - Búgin Táýelsizdik saraıynda QR Premer-mınıstri Kárim Másimov «Paryz» júldesiniń altyn músinshesi men «Halyq tutynatyn eń sapaly taýar kóshbasshysy» arnaıy syılyǵyn tabystady.
Sonymen «Paryz» júldesiniń «Áleýmettik jaýapkershiligi eń joǵarǵy kásiporyn» atalymy boıynsha altyn belgisine Qyzylorda oblysyndaǵy «Saýts-oıl» JShS ıe boldy. Kompanııa dırektory Serikjan Seıitjanov Úkimet basshysynyń qolynan altyn músinshe men dıplomat aldy. Bul kompanııa 2014 jyly qaıyrymdylyq jáne demeýshilik kómek úshin 63 mln teńge, Qyzylorda qalasyndaǵy tennıs ortalyǵynyń qurylysy úshin 440 mln teńge bólgen. Sonymen qatar Aral qalasynda 100 orynǵa arnalǵan sport-saýyqtyrý keshenin salýǵa muryndyq bolǵan.
Al «Eń úzdik ujymdyq kelisimshart» nomınatsııasy boıynsha «Paryz» syılyǵynyń altyn belgisin Aqtóbe oblysyndaǵy «Aqbulaq» AQ ıe boldy. Premer-mınıstr K.Másimovtiń qolynan altyn belgi alǵan kompanııa dırektory Aıbek Saǵıevtiń kásiporny eńbekaqy tóleý, jumys ýaqyty men qyzmetkerleriniń demalys ýaqyty úshin óte tıimdi keste qura bilgen. «Halyq tutynatyn eń sapaly taýar shyǵarýshy» arnaıy syılyǵyn Almaty qalasyndaǵy «Rahat» AQ ıe boldy. QR Premer-Mınıstri syılyq pen arnaıy dıplomdy «Rahat» kompanııasynyń ekonomıka jáne qarjy jónindegi dırektory Záýresh Tóleýbaevaǵa tabystady. Esterińizge sala keteıik, «Rahat» kompanııasy - elimizde kondıterlik ónim shyǵaratyn brendke aınalǵan. Jalpy, búgin 20-ǵa jýyq kásiporyn «Paryz» syılyǵynyń 2, 3 oryndaryna ıe boldy.
