QR Premer-Mınıstri óńirlerge «aqyldy qala» etalondyq standartyn sapaly engizýdi tapsyrdy
Barlyq atalǵan baǵyttar boıynsha atqarylyp jatqan jumystar týraly tsıfrlyq damý, ınnovatsııalar jáne aeroǵarysh ónerkásibi mınıstri A. Jumaǵalıev, «aqyldy qala» tujyrymdamasyn iske asyrý máseleleri týraly Nur-Sultan qalasynyń ákimi A. Kólginov, jer qatynastaryn tsıfrlandyrý týraly aýyl sharýashylyǵy mınıstri S. Omarov jáne «Azamattarǵa arnalǵan úkimet» memlekettik korporatsııasynyń tóraıymy Á. Baltasheva baıandady.
Memlekettik jáne jeke sektorlardyń aqparattyq júıeleri úshin biryńǵaı ıntegratsııalanǵan platforma qurý boıynsha «Smart Bridge» jobasy osy jyldyń qańtar aıynda iske asyryla bastady.
Qazirgi ýaqytta 175 zańdy tulǵa (35 memlekettik organ, 12 ekinshi deńgeıli bank, 15 ulttyq kompanııa, 113 jeke sektor ókili) avtorızatsııalandy, 336 servıs jarııalandy, qosylýǵa 290 ótinim jiberildi.
«Smart Bridge»-de kózdelgen memlekettik organdardyń aqparattyq júıeleriniń 166 ıntegratsııasynyń 27-si iske asyryldy, bıylǵy shilde aıyna deıin 63-in, osy jyldyń sońyna deıin 76-syn júzege asyrý josparlanǵan. Búginde memlekettik qyzmetterdiń 80%-dan astamy avtomattandyryldy, bıylǵy jyldyń sońyna deıin bul kórsetkishti 90%-ǵa deıin jetkizý kózdelgen.
Óńirlerde tsıfrlandyrýdyń birkelkiligin qamtamasyz etý úshin tirshilik áreketiniń 11 salasyn qamtıtyn QR «aqyldy» qalalarynyń etalondyq standarty jandandyryldy. Jańa tujyrymdama boıynsha barlyq qyzmetter men memlekettik qyzmetter «elektrondyq úkimet» portalynyń bir terezesine kóshirilýi tıis.
Jer qory jáne jyljymaıtyn múlik nysandary týraly ulttyq derekter bazasyn qurý aıasynda «Biryńǵaı memlekettik jyljymaıtyn múlik kadastry» aqparattyq júıesin qurý boıynsha jumystar júrgizilýde.
Onymen qosa, jer ýchaskelerin usyný rásimderin ońtaılandyrý jáne jeńildetý boıynsha zań jobasy ázirlenýde, onda Jer kodeksi, Azamattyq kodeks pen birqatar zańdarǵa túzetýler engizý qarastyrylǵan. Tsıfrlyq tehnologııalar negizindegi jańa tásilder jer qatynastary salasyndaǵy memlekettik qyzmetterdi elektrondy formatqa aýystyryp, olardyń sanyn 15-ten 7-ge deıin qysqartýǵa, jer ýchaskelerine quqyq berýdiń naqty merzimin 1 jyldan 20 kúnge deıin azaıtýǵa, memlekettik akti men jer qurylysy jobasyn, sondaı-aq jer komıssııasyn alyp tastaýǵa múmkindik beredi.
Premer-Mınıstr turǵyndar men bıznes úshin barlyq memlekettik qyzmetter men servısterdi onlaın formatqa kóshirý máselesin pysyqtap, bul jumystardy bıyl úshinshi toqsanda aıaqtaýdy, sondaı-aq ortalyq jáne jergilikti deńgeılerde kiriktirý jumystaryn ýaqytyly ári tıimdi iske asyrýdy tapsyrdy.
«Azamattyń densaýlyq pasporty, eńbek bırjasy, qoǵamdyq kóliktegi tólem júıesi tárizdi qoldanystaǵy elektrondy platformalar men esepteýishtermen qamtamasyz etý óńirlerde jappaı paıdalanylýy tıis», - dep A. Mamın, óńirlerdiń ákimdikterine Nur-Sultan jáne Aqkól qalalarynyń tájirıbesiniń negizinde etalondy standartty sapaly engizý boıynsha qajetti sharalardy qabyldaýdy tapsyrdy.
Úkimet basshysy aýyl sharýashylyǵy, tsıfrlyq damý mınıstrlikteri men ákimdikterge úshinshi toqsannyń sońyna deıin jer zańnamasyna qajetti túzetýler jobasyn pysyqtap, Úkimettiń qaraýyna engizý týraly tapsyrma berdi.
«Barlyǵy jurtshylyqty tartýmen ortalyq jáne jergilikti deńgeılerde jan-jaqty pysyqtalýy tıis», - dedi A. Mamın.
Memleket basshysynyń elektrondy úkimet tujyrymdamasyn qaıta qaraý jáne «Tsıfrlyq Qazaqstan» memlekettik baǵdarlamasyn ózektilendirý týraly tapsyrmasyn oryndaý aıasynda Tsıfrlyq damý, ınnovatsııalar jáne aeroǵarysh ónerkásibi mınıstrligine eki apta merzim ishinde Úkimetke memlekettik organdarmen jáne ákimdiktermen kelisilgen tásilderdi engizý týraly tapsyrma júkteldi.