QR Premer-Mınıstri Nıtstsadaǵy terrorlyq aktige baılanysty frantsýz halqyna kóńil aıtty
ASTANA. QazAqparat - Qazaqstannyń Premer-Mınıstri Kárim Másimov Frantsııanyń Astanadaǵy elshiliginde bolyp, Nıtstsada oryn alǵan terrorlyq aktige baılanysty Kóńil aıtý kitabyna jazba qaldyrdy, dep jazady Pm.kz. Premer-Mınıstr óziniń tvıtter-akkaýntynda: «Frantsııa Elshiligine bardym. Posetıl Posolstvo Frantsıı. @AmbaFranceKZ #Nice06» - dep jazdy.
«Ókinishke qaraı qaza tapqandar arasynda Qazaqstannyń tórt azamaty bar. Olardyń týǵan-týystarymen birge bizdiń de qabyrǵamyz qaıysady jáne qaıǵyra kóńil aıtamyz», - dedi K.Másimov
Esterińizge salsaq, budan buryn Prezıdent Nursultan Nazarbaev qaza tapqandar men zardap shekkenderdiń otbasy men týǵan-týysyna, barsha frantsýz halqyna kóńil aıta otyryp, Frantsııa Prezıdenti Fransýa Ollandqa telegramma joldaǵan bolatyn.
