QR Premer-Mınıstri Nazarbaev Ýnıversıtetiniń birqatar nysandaryn aralap kórdi
ASTANA. 27 qazan. QazAqparat - Senbi kúni, 27 qazanda QR Premer-Mınıstri Serik Ahmetov Nazarbaev Ýnıversıtetinde bolyp, oqý ornynyń birqatar nysandaryn aralap kórdi.
Atap aıtqanda, Úkimet basshysy ǵylym jáne tehnologııalar, ınjenerııa, gýmanıtarlyq jáne áleýmettik ǵylymdar mektepteriniń, qazaq tili kafedrasynyń jumystarymen tanysty, zerthanalar men zamanaýı kitaphanany aralap kórdi, dep habarlady QR Premeriniń baspasóz qyzmeti.
Nazarbaev Ýnıversıteti - Astanada Qazaqstan Prezıdenti N.Á.Nazarbaevtyń bastamasymen ashylǵan joǵary oqý orny. Halyqaralyq deńgeıdegi ýnıversıtet derbestik jáne akademııalyq erkindik prıntsıpimen jumys isteıdi. Joǵary oqý ornynyń barlyq akademııalyq jáne ǵylymı-zertteý baǵdarlamalary álemniń úzdik otyz joǵary oqý oryndaryna kiretin ýnıversıtettermen jáne halyqaralyq ǵylymı uıymdarmen resmı áriptestikte júzege asyrylady.
