QR Premer-Mınıstri NASDAQ kompanııasynyń vıtse-prezıdentimen kezdesý ótkizdi
ASTANA. QazAqparat - Búgin Úkimet úıinde Qazaqstan Respýblıkasynyń Premer-Mınıstri Baqytjan Saǵyntaev National Association of Securities Dealers Automated Quotations (NASDAQ - Baǵaly qaǵazdar jónindegi dılerlerdiń ulttyq qaýymdastyǵynyń avtomattandyrylǵan baǵa belgileýleri) kompanııasynyń vıtse-prezıdenti, eýropalyq óńiriniń basshysy Anders Ejendelmen kezdesý ótkizdi, dep habarlaıdy primeminister.kz.
Kezdesý barysynda «Astana» Halyqaralyq qarjy ortalyǵyn (AHQO) damytý aıasynda kompanııamen ózara is-qımyl jáne úzdik álemdik standarttar deńgeıinde AHQO joǵary tehnologııaly bırja jáne eseptik-klırıng ınfraqurylymyn qurý perspektıvalary talqylandy.
Aıta keteıik, NASDAQ - bul AQSh-taǵy ekinshi iri qor bırjasy (kompanııa saıty - nasdaq.com), onda barlyq ashyq túrdegi aktsıonerlik kompanııalardyń baǵaly qaǵazdarynyń jartysy shyǵarylady. Ol sondaı-aq osy bırjada saýda jasaıtyn kompanııalardyń naryqtyq kapıtalızatsııasy boıynsha (Nıý-Iork qor bırjasynan keıingi) álemdegi ekinshi iri bırja bolyp sanalady, bırja álemniń basqa bırjalarymen salystyrǵanda elektrondyq saýdanyń eń joǵarǵy kólemine ıe.
