QR Premer-Mınıstri Mysyrda Airbus A321 ushaǵynyń apatqa ushyraýyna baılanysty kóńil aıtty
ASTANA. QazAqparat - Qazaqstan Respýblıkasynyń Premer-Mınıstri Kárim Másimov Astanadaǵy Reseı Elshiligine baryp, Mysyrda «Kogalymavıa» avıakompanııasy «Airbus A321» ushaǵynyń apatqa ushyraýyna baılanysty kóńil aıtty. Bul týraly Qazaqstandaǵy Reseı Elshiligi Feısbýktegi óz resmı paraqshasynda jazdy.
«Qazaqstan Premer-Mınıstri K. Másimov ushaqtyń apatqa ushyraýyna baılanysty barsha qaza bolǵandardyń jaqyndary men týystaryna, kúlli Reseı halqynyń qaıǵysyna ortaqtasyp, kóńil aıtý kitabyna jazba qaldyrdy», - dep atap ótiledi habarlamada.
«Oryn alǵan aýyr qaıǵyǵa oraı Reseı halqyna, Reseı Federatsııasynyń Úkimetine kóńil bildiremin. Kárim Másimov», - dep jazdy ol.
