QR Premer-Mınıstri MGM-niń jańa basshysy Uzaqbaı Qarabalındi tanystyrdy
Bul týraly QR Premer-Mınıstriniń resmı saıtynan habarlandy.
«Memleket basshysynyń Jarlyǵyna sáıkes Saýat Myńbaev basqa jumysqa aýysýyna baılanysta QR munaı jáne gaz mınıstri qyzmetinen bosatyldy. Vedomstvonyń jańa basshysy bolyp Uzaqbaı Qarabalın taǵaıyndaldy», - dep habarlady S.Ahmetov.
Úkimet basshysy MGM-niń burynǵy basshysy S.Myńbaevtyń salaǵa sińirgen eńbegin atap aıtty.
«Saýat Muhametbaıuly Munaı jáne gaz mınıstri retinde Qazaqstannyń munaı-gaz salasyn damytýǵa, munaı óńdeý zaýyttaryn jańǵyrtý men iri halyqaralyq jobalardaǵy qazaqstandyq úlesti arttyrýǵa úlken úles qosty», - dedi S.Ahmetov. Premer-Mınıstr S.Myńbaevqa nátıjeli qyzmeti úshin alǵys aıtyp, aldaǵy eńbegine tabystar tiledi.
U.Qarabalındi MGM ujymyna tanystyra otyryp, Premer-Mınıstr onyń respýblıkanyń munaı-gaz sektoryndaǵy kópjyldyq jumys tájirıbesin atap ótti.
«Uzaqbaı Súleımenuly ár jyldary munaı jáne gaz óndirisi mınıstriniń orynbasary, energetıka jáne mıneraldyq resýrstar mınıstriniń orynbasary mindetterin atqaryp, alty jyldan astam ýaqyt «QazMunaıGaz» Ulttyq kompanııasyn basqardy.
Uzaqbaı Qarabalınniń elimizdiń Prezıdenti Nursultan Nazarbaevtyń joǵary senimin aqtaıtynyna senim bildiremin», - dep atap kórsetti S.Ahmetov.
Óz kezeginde, U.Qarabalın ózine kórsetilgen senim úshin alǵys bildire otyryp, Memleket basshysynyń munaı-gaz salasy aldyna qoıǵan mindetterdi júzege asyrý úshin MGM ujymynyń barlyq kúsh-jigerin jumsaıtynyna sendirdi.
Serik Ahmetov sondaı-aq MGM aldynda turǵan birqatar mindetterdi atady.
«Mınıstrlik pen munaı-gaz salasynyń aldynda jańa munaı-hımııa óndirisin qalyptastyrý men damytý, qazaqstandyq mazmundy arttyrý, kadrlar daıyndaý sııaqty úlken mindetter tur. Bul mindetter, árıne, jeńil emes, sonymen qatar, munaı-gaz salasynda qazirgi zamanǵy daıyndyqtan ótken menedjerler jumys isteıdi. Mınıstrlik ujymy men onyń basshylyǵyna alǵa qoıylǵan mindetterdi oryndaýda tabystar tileımin», - dedi S.Ahmetov.