QR Premer-Mınıstri: Medıtsınalyq tehnıka belsendi paıdalanylýy kerek
ASTANA. QazAqparat - Búgin Úkimet otyrysynda QR Premer-Mınıstri Baqytjan Saǵyntaev medıtsınalyq tehnıkalardyń tıimdi paıdalanylýyna baqylaýdy jalǵastyrýdy tapsyrdy, dep habarlaıdy QazAqparat.
«Bizde medıtsınalyq tehnıkalar alý sharalary ártaraptandyrylǵan, biryńǵaı tehnıka alynbaıdy, sondaı-aq olarǵa servıstik qyzmet kórsetilmeıdi. Osy baǵytta atqarylyp jatqan jumystardyń baǵytyn búgin tyńdadyq. Bul rette atqarylǵan jumystar jobasy durys. Mınıstrlik tarapy «Atameken» UKP-men jáne jergilikti jerlerdegi ákimdiktermen birige otyryp, bul jumysty jalǵastyrýy qajet. Birinshi kezekte utymdy josparlaýdyń mańyzdylyǵyn qaraý shart, sondaı-aq qajetti degen negizgi medıtsınalyq tehnıkalarǵa nazar aýdarǵan jón», - dep tapsyrdy Úkimet basshysy.
Sonymen qatar B. Saǵyntaev satyp alynǵan jańa tehnıkanyń belsendi paıdalanylýyn baqylaý qajettigin qadap aıtty.
Budan buryn Qazaqstanda medıtsınalyq tehnıkany tıimdi paıdalanbaý faktileri tergelip jatqandyǵy aıtylǵan bolatyn.
«Memleket basshysynyń tapsyrmasyna sáıkes, mınıstrlik medıtsınalyq tehnıkany paıdalaný tıimdiligin taldaý maqsatynda 2012-2016 jyldar aralyǵynda satyp alynǵan tehnıkaǵa kezeń-kezeńmen tekserý júrgizdi. Sonyń ishinde quny 5 mln teńgeden joǵary medıtsınalyq tehnıkaǵa aýdıt jasaldy. Aýdıt qorytyndylary boıynsha zańbuzýshylyqtar anyqtaldy», - dedi Densaýlyq saqtaý mınıstri Eljan Birtanov.
Osy oraıda satyp alynatyn medıtsınalyq tehnıka qunynyń ulǵaıýy, medıtsınalyq jabdyqtyń jumys istemeı turyp qalýy, medıtsınalyq tehnıkaǵa 3 jyl mindetti servıstik qyzmet kórsetilmeýi jáne basqa da kemshilikter bolǵan.
