QR Premer-Mınıstri Qyrǵyzstanǵa qatysty «sur ımport» týraly dáleldi málimetterdi keltirdi - sarapshy
«Keshe Baqytjan Ábdiruly (Saǵyntaev - QazAqparat) EAEO elderiniń Qytaı Halyq Respýblıkasymen saýda-sattyq qarym-qatynasy týrasynda dáleldi statıstıkany keltirdi. Ol málimetterde Eýrazııalyq ekonomıkalyq odaqqa kirgeli beri Qyrǵyzstanǵa «sur ımporttyń» mólsheri artyp ketkeni kórsetilgen», - deıdi ol.
Rahym Oshaqbaev óz sózinde Qazaqstan tarapy kedendik baqylaýdy alyp tastaǵan jaǵdaıda Qyrǵyzstanmen shekarada taýardyń atalǵan «sur» aǵyny jaýlap alatynyna saqtyqpen qarap otyrǵanyn atap ótti.
«Bul jaǵdaı Qazaqstannyń ǵana emes, búkil Eýrazııalyq ekonomıkalyq odaqtyń ekonomıkasyna aıtarlyqtaı keri áserin tıgizedi», - deıdi Rahym Oshaqbaev.
Sonymen birge, ol Qyrǵyzstannyń Premer-Mınıstri Sapar Isakovtyń feısbýktaǵy jazbasymen tanys ekenin bildirdi.
«Qoıylǵan suraqtar boıynsha qyrǵyz tarapy eshqandaı jaýap bermeı otyr. Іshinde 43 pýnkt bar «Jol kartasy» ázirlenip jatqany aıtyldy. Biraq, oǵan qazirgi ýaqytta qol qoıylǵan joq. Meniń bilýimshe, ol qujatqa qyrǵyz tarapy qol qoımaı otyr. Jeke óz basym qazaqstandyq taraptyń aýmaǵymyzǵa zańsyz taýarlar men «sur ımporttyń» enýine, tártipti ornatýǵa degen áreketin qoldaımyn», - deıdi ol.
«Talap» qoldanbaly zertteýler ortalyǵynyń esebine sáıkes, Qazaqstan «sur ımporttyń» keselinen jylyna 162 mln AQSh dollar qarajatyn joǵaltady.
«Menińshe, qyrǵyz tarapy jaýapkershilikti óz moınyna alyp qana qoımaı, máseleni sheshý jolynda naqty qadamǵa barýy kerek sekildi. Óıtkeni problemanyń bar ekeni kózge uryp tur. Bardy bar dep aıtyp otyrǵanymen, máseleniń sheshilýi jolynda Qyrǵyzstan eshteńe jasamaı otyr. Qyrǵyzstanda atalǵan máseleni sheshýge qarsylyq tanytyp otyrǵan bılikte quzyrly benefıtsıarlar da bar degen pikirler aıtylyp júr», - deıdi Rahym Oshaqbaev.
Buǵan qosa sarapshy Qyrǵyzstan EAEO quramyna engennen keıin Qazaqstan ol taraptyń «sur ımportqa» qatysty áreketterine kóz juma qarap kelgenin atap ótti.
«Bul másele kúni búginge deıin sheshimin tappaı otyrǵandyqtan, biz óz naryǵymyzdy qorǵaýymyz kerek. Álbette, azdaǵan ózgeris bolýy múmkin. Biraq, báribir másele ózekti kúıinde qalady. Muny retke keltirýdiń bir-aq qana jolyn Qazaqstan júzege asyryp otyr. Ol - taýar óndirýshilik nemese eshqandaı kommertsııalyq qujattarsyz kelgen shekaradaǵy taýarlarǵa baqylaý ornatyp, jaramaıtyn taýardy keri qaıtaryp otyrý. Menińshe, Qazaqstan tarapy ustanymyn Qyrǵyzstan óz jumysyn retke keltirgenshe ózgertpeýi kerek», - deıdi ol.
