QR Premer-Mınıstri Kárim Másimov jylý berý maýsymyndaǵy túıtkilderdi tolyqtaı sheshýdi tapsyrdy

«Daıyndyq boıynsha, biz buǵan deıin birqatar selektorlyq keńes ótkizdik, alaıda qys bastalǵanda keıbir máseleler týyndap jatyr. Keı óńirlerde obektıvti, keı jerlerde sýbektıvti sebepter bar. ıAǵnı qys tússe boldy, ońtústikte gaz jetispeýshiligi oryn alady. Qalaı aldyn ala qarastyrylsa da, bul másele jylda qaıtalanady», - dep synǵa aldy Úkimet basshysy jaýapty organdardyń jumystaryn.

Bul turǵyda K. Másimov mınıstrlik pen «QazMunaıGaz» kompanııasy tıisti jumystardy aldyn ala zerdelep, oılastyrýy kerektigin qadap aıtty. Premer-Mınıstrdiń paıymdaýynsha, gaz boıynsha problemalardyń týyndaý múmkindigin eskerip, aldyn ala saqtandyrý kelisimderin jasaý qajet. Osy oraıda K. Másimov orynbasary Áset Isekeshevke jylý berý maýsymyna baılanysty, barsha qarjylyq, tehnıkalyq máselelerdi qarastyrýdy júktedi.

«ıAǵnı budan keıingi ýaqytta bul máseleler týyndamas úshin, kelesi Úkimet otyrysynda qajetti qaýlyny qabyldaý qajet», - dep túıindedi Úkimet basshysy.

Eske sala keteıik, Munaı jáne gaz vıtse-mınıstri Berik Tolymbaevtyń habarlaýynsha, 1 qarashadan bastap elimizdiń ońtústik óńirlerinde Ózbekstan tarapynan gaz jetkizilimine shekteý qoıylǵandyqtan gaz jetispeýshiligi týyndaǵan bolatyn. «Birinshi qarashadan beri Ózbekstan tarapy gaz jetkizilimine shekteý qoıdy. Tapsyrys boıynsha, belgilengen 397 myń tekshe metr gazdyń jetkizilimi 100 myń tekshe metrge tómendetildi. Turaqtylyqty saqtaý úshin Poltoradskoe, Kóktóbe qoımalarynan, Amangeldi ken ornynan gaz jetkizilimi kóbeıtildi», - dep atap ótti vıtse-mınıstr.

Onyń sózine qaraǵanda, atalǵan máseleni sheshý úshin mınıstrlik «QazMunaıGaz» jáne «QazTransGaz» kompanııalarymen birlese, Ózbekstanǵa baryp kelissózder júrgizdi. Alaıda ózbekstandyq tarap gaz jetkizilimindegi shekteýdi doǵarmady.

«Osyǵan baılanysty 10 qarashada qytaılyq «CNPC» kompanııasymen kelisimge qol jetkizdik. Osynyń aıasynda 2011-2012 jyldardyń kúzgi jáne qysqy maýsymynda 500 mln. tekshe metr kóleminde gazdy almastyrýǵa ýaǵdalastyq jasaldy. Onyń ishindegi 12 mln. tekshe metri jyl sońyna deıin jetkiziledi», - dedi B. Tolymbaev.

Onyń aıtýynsha, 10 qarasha kúni saǵat 21.00-den bastap, Túrikmenstan gazy elimizdiń júıesine jetkizile bastady. 12 qarashada bul baǵyttaǵy ahýal turaqtandy. Qazirgi kezde tıisti jumystar qalypty rejımde atqarylyp jatyr.