QR Premer-Mınıstri Kárim Másimov Almatyǵa jumys saparymen keldi
ALMATY. QazAqparat - Búgin Almatyǵa jumys saparymen QR Premer-Mınıstri Kárim Másimov keldi. Almaty halyqaralyq áýejaıynda Úkimet basshysyn Almaty qalasynyń ákimi Baýyrjan Baıbek, QR Energetıka mınıstri Qanat Bozymbaev, QR Aýyl sharýashylyǵy mınıstri Asqar Myrzahmetov, jergilikti jáne aýmaqtyq memlekettik organdardyń ókilderi, sondaı-aq, basqa da joǵary qyzmettegi tulǵalar qarsy aldy.
Eń aldymen Kárim Qajymqanuly Almaty halyqaralyq áýejaıynyń ushý alańy mańynda ornatylǵan arnaıy stendti tamashalady. Munda sóz alǵan Almaty qalasy ákiminiń orynbasary Rýmıl Taýfıkov Úkimet basshysyn ońtústik astanadaǵy áýejaı, temirjol vokzaldary jáne avtobeketterdiń qaýipsizdigi boıynsha atqarylyp jatqan jumystarmen tanystyrdy.
Budan keıin Kárim Másimov Almaty qalasynyń Medeý aýdanynda ornalasqan «Innovatsııalyq tehnologııalar parki» arnaıy ekonomıkalyq aımaǵyna júrip ketti.
Aıta ketelik, búgin Úkimet basshysy Almatyda birqatar nysandardy aralaıdy.
Olardyń ishinde Almaty oblysy, Talǵar aýdanynyń Arqabaı aýylynda ornalasqan «Baıserke Agro» JShS baryp, osy agroónerkásiptik keshenniń jumysymen tanysady. Odan keıin, Naýryzbaı aýdanyna baryp, Qaraǵaıly ózeniniń arnasyn nyǵaıtý, 2015 jyly oryn alǵan seldiń saldaryn joıý jumystarymen tanysyp, qurylysshylarmen jáne merdigerlermen áńgimelesedi. Odan ári, Alataý aýdanynda ornalasqan «Saıaly» yqsham aýdanyna kelip, Óńirlerdi damytýdyń 2020 jylǵa deıingi memlekettik baǵdarlamasy aıasynda salynǵan 65 kópqabatty turǵyn úılerdi aralap kóredi. Munda 10 jas otbasyǵa páter kilti tabys etiledi. Budan keıin, Kárim Másimov Alataý aýdanynyń Shańyraq shaǵyn aýdanyna baryp, Qaraǵaıly ózeniniń arnasyn nyǵaıtý jumystarymen tanysyp, jergilikti turǵyndarmen sóılesedi. Tústen keıin Úkimet basshysy 12 myń oryndy Muz saraıy men 5 myń oryndy Atletıkalyq qalashyqqa baryp, qurylys jumystarynyń barysymen tanysady. Budan soń, Pedıatrııa jáne balalar hırýrgııasy ǵylymı ortalyǵynda Úkimet basshysynyń, sondaı-aq, densaýlyq saqtaý salasynyń mamandary jáne ǵylymı-zertteý ınstıtýttarynyń ǵalymdarynyń qatysýymen múmkindigi shekteýli balalarǵa kómek kórsetý boıynsha shaǵyn jıyn bolady. Búgin jumys sapary barysynda Kárim Másimov belgili memleket jáne qoǵam qaıratkeri, aǵartýshy ǵalym, aqyn Ahmet Baıtursynulynyń murajaıynda bolyp, osy mekemeniń jumysymen tanysady. Budan keıin, keshke qaraı, Almaty qalasy ákimdiginde Úkimet basshysy ońtústik astananyń bas josparymen tanysady jáne kásipkerlikti damytý jáne bank qyzmeti taqyrybynda ótetin otyrystarǵa qatysady.
