QR Premer-Mınıstri K. Másimov Sankt-Peterbýgta ótetin TMD Úkimet basshylary keńesiniń kezekti májilisine qatysady
ASTANA. Mamyrdyń 17-si. QazAqparat /Ernur Aqanbaı / - QR Premer-Mınıstri Kárim Másimov mamyrdyń 21 kúni Sankt-Peterbýrgta ótetin TMD Úkimet basshylary keńesiniń kezekti otyrysyna qatysady. Bul týraly búgin Astanadaǵy aptalyq brıfıngte QR Syrtqy ister mınıstrliginiń resmı ókili Asqar Ábdirahmanov málim etti,
dep habarlaıdy QazAqparat.
«Kún tártibine 19 másele enip otyr. Onyń ishinde energetıka salasyndaǵy yntymaqtastyq tujyrymdamasyn júzege asyrý jónindegi birinshi kezektegi is-sharalar jospary, 2012 jylǵa deıingi kezeńge arnalǵan memleketaralyq radıonavıgatsııalyq baǵdarlama, TMD-nyń 20 jyldyǵyna arnalǵan máseleler jáne ózge de dúnıeler bar, dedi A. Ábdirahmanov.
Onyń aıtýynsha, májilis barysynda birqatar qujattarǵa qol qoıylý josparlanyp otyr. Atap aıtqanda, Ulttyq naryqtarǵa taýarlar men qyzmetterdi jyljytý úshin memleketaralyq aqparattyq-marketıngtik ortalyqtar jelisin qurýdaǵy, paıdalanýdaǵy jáne damytýdaǵy yntymaqtastyq týraly kelisimge, sondaı-aq Ortaq elektroenergetıkalyq naryqty qalyptastyrý kezeńderi týraly hattamaǵa jáne birqatar ózge de halyqaralyq kelisimsharttarǵa qol qoıylady dep kútilýde.
Sondaı-aq atalmysh is-shara aıasynda QR Premer-Mınıstri birqatar eki jaqty kezdesýler ótkizedi dep josparlanyp otyr.
