QR Premer- Mınıstri K. Másimov Belarýs Respýblıkasyna jumys saparymen barady
ASTANA. Mamyrdyń 17-si. QazAqparat /Ernur Aqanbaı / - Mamyrdyń 19-20 kúnderi QR Premer-Mınıstri Kárim Másimovtiń Belarýs Respýblıkasyna jumys sapary ótedi. Sapar barysynda eki memleket úkimetteriniń basshylary shaǵyn quramda kelissózder júrgizedi. Bul týraly búgin Astanadaǵy aptalyq brıfıngte QR Syrtqy ister mınıstrliginiń resmı ókili Asqar Ábdirahmanov málim etti,
dep habarlaıdy QazAqparat.
Onyń aıtýynsha, sondaı-aq K. Másimov Mınskide ótetin qazaq-belarýs iskerlik forýmyna qatysady. Forým aıasynda Qazaqstannyń ındýstrııalandyrý kartasyna engizilgen belarýs tarapy usynǵan ekonomıkalyq jobalar talqylanatyn bolady. Bul jobalar saýda-ekonomıkalyq, otyn-energetıkalyq, mashına jasaý, agroónerkásip, ǵarysh jáne gýmanıtarlyq salalardaǵy eki jaqty yntymaqtastyqtyń mańyzdy baǵyttaryn aıqyndaıdy.
«Іskerlik forýmyna Qazaqstannyń iskerler tobynyń 130-dan astam ókilderi qatysady dep kútilýde», dedi resmı ókil.
