QR Premer-Mınıstri IDB jáne Oppenheimer qorynyń basshylyǵymen kezdesti
ASTANA. QazAqparat - Búgin «Astana» halyqaralyq qarjy ortalyǵynyń resmı ashylýy aıasynda QR Premer-Mınıstri Baqytjan Saǵyntaev Oppenheimer qorynyń basqarýshy dırektory Djon Tonellımen jáne Islam damý bankiniń prezıdenti doktor Bandar Mohammed Hamza Hadjarmen kezdesti, dep habarlaıdy QazAqparat primeminister.kz silteme jasap.
Kezdesýler barysynda Qazaqstandaǵy ınvestıtsııalyq jobalardy qarjylandyrý turǵysynan odan ári yntymaqtastyq máseleleri talqylandy, sondaı-aq halyqaralyq bıznes úshin keńeıtilip jatqan múmkindikter qaraldy.
Islam damý bankiniń prezıdenti doktor Bandar Mohammed Hamza Hadjarmen kezdesýde ekonomıkanyń basym sektorlarynda, onyń ishinde aýyl sharýashylyǵy, ınfraqurylymdyq jobalar, sondaı-aq ǵylym men tehnologııalardy damytý salalarynda ózara is-qımyldy nyǵaıtý keleshegi qaraldy.
1995 jyly Islam yntymaqtastyǵy uıymyna qosylǵannan keıin Qazaqstan Islam damý bankiniń múshesi boldy. 2012-2015 jyldary Qazaqstan aýmaǵynda IDB óziniń TMD aýmaǵyndaǵy alǵashqy Eldik strategııasyn júzege asyrdy, bul el ekonomıkasyna, atap aıtqanda, saýdany qarjylandyrý, jekemenshik sektordy damytý jáne saqtandyrý salalaryna shamamen $650 mln tartýǵa jol ashty. Búgingi tańda bank jalpy somasy $1,874 mlrd quraıtyn 67 jobany maquldady. IDB qoldaýdyń negizgi baǵyttary: kólik ınfraqurylymyn damytý (jalpy operatsııalar somasynyń 55,8%), aýyl sharýashylyǵyn damytý (23,3%), shaǵyn jáne orta bıznesti jáne qarjy sektoryn damytý (19%), bilim berý (1%), densaýlyq saqtaý (0,8%), aqparattyq-kommýnıkatsııalyq tehnologııalar, sanıtarlyq baqylaý jáne qala qyzmetteri.
Kezdesýge qatysýshylar Qazaqstannyń IDB-men yntymaqtastyǵynyń keńeıýine Astanada AHQO bazasynda Halyqaralyq ıslam saýda-qarjy korporatsııasy (ITFC) ókildiginiń ashylýy yqpal etetinin atap ótti.
Doktor Bandar Mohammed Hamza Hadjar QR-nyń ITFC-ke qosylýy ulttyq eksportty jáne ózara saýdany jetildirýge yqpal etetinin, sondaı-aq Qazaqstanǵa IYU-ǵa múshe elder retindegi jańa quraldar men turaqty qarjy kózderin, naryqtardy qamtamasyz etetinin málimdedi. Budan ózge, bul Qazaqstanǵa IYU elderimen ózara saýda-sattyqta qundy tájirıbe alýǵa, sonymen qatar ITFC tehnologııalary men jınaqtalǵan tájirıbeni daıyn ónim eksportyn damytýǵa baǵyttaýǵa jol ashady.
Oppenheimer qorynyń dırektory D. Tonellıdiń Baqytjan Saǵyntaevpen kezdesýi barysynda kompanııanyń «Samuryq-Qazyna» UÁQ jekeshelendirý baǵdarlamasyna qatysýy, ınfraqurylymdyq qor qurý, sondaı-aq qazaqstandyq kompanııalardy sheteldik kapıtal naryqtaryna shyǵarý máseleleri qaraldy.
Oppenheimer - ınvestorlarǵa, jeke tulǵalarǵa, kásiporyndarǵa jáne mekemelerge qarjy qyzmetteri men keńester beretin jetekshi ınvestıtsııalyq bankterdiń biri jáne kópbeıindi ınvestıtsııalyq kompanııa.
Eske sala ketsek, QR Prezıdentiniń 2018 jyldyń qańtar aıynda AQSh-qa resmı sapary aıasynda Oppenheimer qory men «Kazakh Invest» UK arasynda ınfraqurylymdyq jobalardy qarjylandyrý jáne uzaq merzimdi nesıelendirý úshin ınfraqurylymdyq qor qurý týraly memorandýmǵa qol qoıyldy.
