QR Premer-Mınıstri eldiń áleýmettik-ekonomıkalyq damýy máseleleri boıynsha birneshe tapsyrma berdi
ASTANA. QazAqparat - Búgin QR Premer-Mınıstri Kárim Másimov Úkimet otyrysyn ótkizdi, onda eldiń áleýmettik-ekonomıkalyq damýy máseleleriniń keń aýqymy talqylandy, dep habarlaıdy primeminister.kz.
Premer-Mınıstrdiń orynbasary - Indýstrııa jáne jańa tehnologııalar mınıstri Á.Isekeshev QR Prezıdenti janyndaǵy Sheteldik ınvestorlar keńesiniń 26-shy jáne 27-shi plenarlyq otyrystarynda jarııalanǵan Memleket basshysynyń tapsyrmalaryn júzege asyrý barysy týraly baıandady. Aǵymdaǵy jyldyń 5 aıynda eldiń áleýmettik-ekonomıkalyq damýynyń qorytyndylary jáne maqsatty ındıkatorlarǵa jetý týraly esepti ekonomıka jáne bıýdjettik josparlaý mınıstri E.Dosaev; kórsetilgen merzimge memlekettik bıýdjetti oryndaý týraly qarjy mınıstriniń orynbasary R.Dalenov baıandady. Vıtse-mınıstr habarlaǵandaı, «bıýdjetterdiń barlyq deńgeıleriniń tabystary boıynsha josparlar oryndaldy». «Memlekettik bıýdjet kiristeri 104,5% nemese 3,088 trln. teńgeni qurady, respýblıkalyq bıýdjet kiristeri 2,2%-ǵa asyra oryndalyp, 2,5 trln. teńgeni qurady. 5 aıdyń qorytyndysy boıynsha memlekettik bıýdjet shyǵyndary 3,040 trln. teńgege jetti, jáne ótken jyldyń sáıkes merzimimen salystyrǵanda 19%-ǵa artty», - dep tolyqtyrdy R.Dalenov. Otyrysta sondaı-aq Óńirlik damý mınıstri B.Jámishev tanystyrǵan Astana qalasynyń qala mańy aımaǵyn damytý Keshendi jospary maquldandy. Sonymen birge, Kólik jáne kommýnıkatsııa mınıstri J.Qasymbek Úkimet múshelerine azamattyq avıatsııany damytý perspektıvalary týraly aıtty. KKM basshysy atap ótkendeı, «áýe tasymaldaý naryǵynyń jyl saıynǵy ósýi 10% deńgeıinde saqtalýda, 2013 jyldyń qorytyndysy boıynsha otandyq áýe kompanııalary tasymaldaǵan jolaýshylar sany 5 mln. adamdy qurady». J.Qasymbek salalyq zańnamalyq bazany jetildirý, jańa áýe kompanııasyn qurý, jerdegi avıatsııalyq ınfraqurylymdy damytý, kadrlar daıarlaý boıynsha KKM josparlary týraly habardar etti. Otyrysta sondaı-aq kedendik ákimshilikti jetildirý sharalary týraly Premer-Mınıstrdiń orynbasary - Qarjy mınıstri B.Sultanov, sondaı-aq Aýyl sharýashylyǵy mınıstri A.Mamytbekov habarlady. Otyrys qorytyndysy boıynsha Premer-Mınıstr tıisti memlekettik organdarǵa birqatar tapsyrmalar berdi.
