QR Premer-Mınıstri Elbasy Joldaýynda júktelgen mindetter boıynsha birqatar tapsyrmalar berdi
ANA. 29 qańtar. QazAqparat /Arman Asqarov/ - Búgin Úkimet úıinde ótken Mınıstrler kabınetiniń otyrysynda QR Premer-Mınıstri Kárim Másimov Elbasynyń Joldaýynda júktelgen mindetter boıynsha mınıstrlikter men vedomstvolarǵa birqatar tapsyrmalar berdi.
Atap aıtqanda, K.Másimov mal sharýashylyǵyn damytý jobasy boıynsha tıisti usynystar engizýdi tapsyryp, osy máseleni Úkimettiń otyrysynda arnaıy qaraý qajettigin jetkizdi. «Kelesi aptada ekonomıkany modernızatsııalaý boıynsha otyrys ótkizýdi tapsyramyn. Sol kezde osy máseleni bekitip, qaraıtyn bolamyz», - dedi K.Másimov. Bul tapsyrmany ol óziniń orynbasary Ó.Shókeevke tapsyrdy.
Budan basqa Premer-Mınıstr energııa tıimdiligin arttyrýdyń keshendi josparyn, ındýstrııalyq-ınnovatsııalyq damý aıasynda aımaqtardy damytý baǵdarlamasyn, halyqty aýyzsýmen qamtamasyz etýdiń jańa baǵdarlamasyn, kásibı tehnıkalyq mamandardy daıarlaý jónindegi ulttyq keńestiń quramy men jumys josparyn, 400 orta bilim berý oshaqtaryn salýdyń boljamyn, kóliktik medıtsınany damytý josparyn, halyqty jumyspen qamtýdyń jańa 2020 baǵdarlamasyn, mıkronesıelendirý júıesiniń qoljetimdiligin arttyrý mehanızmin, turǵyn úı- kommýnaldyq sharýashylyqty damytýdyń jańa baǵdarlamasyn ázirleýdi, tilderdi damytýdyń memlekettik baǵdarlamasyn daıarlaýdy tezdetýdi tapsyrdy. Sondaı-aq Úkimet basshysy Elbasy Nursultan Nazarbaevtyń Qazaqstan halqyna Joldaýynyń negizgi mindetterin jan-jaqty túsindirý jáne Táýelsizdiktiń 20 jyldyǵyn atap ótý boıynsha tıisti usynystardy engizýdi tapsyrdy.
