QR Premer-Mınıstri Djeffrı Todd Levımen kezdesti
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev «Shevron Eýropa, Eýrazııa, Taıaý Shyǵys. Barlaý jáne Óndirý» prezıdenti Djeffrı Todd Levımen kezdesý ótkizdi, dep habarlaıdy primeminister.kz
Kezdesý barysynda munaı-gaz salasyndaǵy kompanııamen yntymaqtastyqty odan ári jalǵastyrý máseleleri talqylandy. Atap aıtqanda, «Teńizshevroıl» JShS, Qarashyǵanaq jobasy jáne Kaspıı qubyr konsortsıýmy boıynsha ózara is-qımyl máseleleri qaraldy.
Anyqtama: «Shevron» kompanııasy «Pacific Oil Coast Co» ataýymen 1879 jyly qurylǵan. Shtab-páteri San-Ramon qalasynda ornalasqan (Kalıfornııa, AQSh), operatsııalary álemniń 180 elinde júrgiziledi. Qyzmetkerler sany shamamen 62 myń adam. Kompanııa kapıtaly $232 mlrd quraıdy.
Qazaqstanda «Shevron» «Teńizshevroıl» JShS-na (50%), Qarashyǵanaq jobasyna (18%), Kaspıı qubyr konsortsıýmyna (15%) qatysady. «Teńizshevroıl» JShS (TShO) jobasy týraly kelisimge 1993 jylǵy 2 sáýirde QR men «Shevron» kompanııasy arasynda qol qoıyldy. Kómirsýtegin barlaý jáne óndirýge arnalǵan lıtsenzııa TShO-ǵa 1993 jyly 40 jyl merzimge berildi. 2018 jylǵa arnalǵan munaı óndirý jospary 27,8 mln tonnany quraıdy.
Qarashyǵanaq jobasy Qazaqstan Respýblıkasynyń Úkimeti men «Brıtısh Gaz» («Shell») - 29,25%, «ENI» - 29,25%, «Shevron» - 18%, «Lýkoıl» - 13,5% jáne «QazMunaıGaz» AQ - 10% úlestik qatysýymen, atalǵan kompanııalar Alıansynyń arasynda qol qoıylǵan Ónimdi bólý týraly túpkilikti kelisim aıasynda iske asyrylady. Kelisimge 1997 jyldyń 18 qarashasynda, 40 jyl merzimge qol qoıyldy.
2017 jyly naqty óndirý kólemi 11,2 mln tonna suıyq kómirsýtekterin (josparda - 10,7 mln t) jáne 18,9 mlrd m3 gazdy (josparda - 18,3 mlrd m3) qurady. 2018 jyly suıyq kómirsýtekterdi óndirý jospary - 10,887 mln tonna, gaz óndirý - 18,37 mlrd m3.
Jalpy uzyndyǵy 1510 shaqyrym bolatyn (onyń 452 shaqyrymy - qazaqstandyq úles) «Kaspıı Qubyr Konsortsıýmy» (KQK) munaı qubyry qazaqstandyq munaı ken orny «Teńiz» ben Qara teńizdegi «Ońtústik Ozereevka» munaı termınalyn biriktiredi. Ol 2001 jyly paıdalanýǵa berildi. 2017 jyly KQK munaı qubyrymen 55,1 mln tonna munaı tasymaldandy, onyń ishindegi qazaqstandyq mólsher - 49,6 mln tonna.
