QR Premer-Mınıstri daǵdarystan zardap shekken básekege qabiletti kásiporyndardy saýyqtyrý jónindegi Keńestiń alǵashqy otyrysyn ótkizdi
TANA. 28 qazan. QazAqparat - Elimizdiń Premer-Mınıstri Kárim Másimov búgin Saýyqtyrý jónindegi keńestiń birinshi otyrysyn ótkizdi, dep habarlandy QR Úkimet basshysynyń http://pm.kz saıtynda.
Otyrysta Daǵdarystan keıingi qalpyna keltirý baǵdarlamasynyń ekinshi kezeńine (básekege qabiletti kásiporyndardy saýyqtyrý) qatysýǵa kásiporyndarǵa ruqsat berý máselesi qaraldy.
«Daǵdarystan zardap shekken básekege qabiletti kásiporyndardy saýyqtyrý jónindegi Keńestiń alǵashqy otyrysyn ótkizdim», - dep jazdy búgin Kárim Másimov Twitter-ge.
Qazirgi tańda júıequrýshy 7 kásiporyn Baǵdarlama talaptaryna sáıkestigi týraly salalyq organdardyń oń saraptamalyq qorytyndysyn aldy jáne qatysýǵa ótinishterin berdi. Keńeske qatysýshylar Baǵdarlamanyń ekinshi kezeńine jiberilgen azyq - túlik, qaıta óńdeý jáne toqyma ónerkásibine kiretin jeti kásiporynnan turatyn tizimdi talqylap, bekitti.
Sonymen birge, Keńes músheleri Daǵdarystan keıingi qalpyna keltirý baǵdarlamasyna engizý josparlanyp otyrǵan birqatar ózgertýler men tolyqtyrýlardy talqylady.
Esterińizge sala keteıik, Saýyqtyrý jónindegi keńes Daǵdarystan keıingi qalpyna keltirý baǵdarlamasynyń (básekege qabiletti kásiporyndardy saýyqtyrý) maqsat-mindetterine qol jetkizýge jaýapty konsýltatıvtik-keńes organy bolyp tabylady.
Baǵdarlamaǵa qatysý úshin eki kezeńnen ótý kerek. Birinshi kezeńde kásiporyn óziniń júıequrýshy kásiporyn ekenin rastaıtyn qujattardy jınaýy jáne Baǵdarlama talaptaryna sáıkes bolýy kerek. Ekinshi kezeńde konsýltanttar kásiporyndy saýyqtyrý jónindegi jospardy ázirleýi jáne ol qujatty Kredıtorlar komıteti bekitýi, odan keıin qujat Saýyqtyrý jónindegi keńestiń otyrysynda qaralýy kerek.
2016 jylǵa deıin júıequrýshy 30-50 kásiporyn saýyqtyrý amaldarynan ótedi, kásiporyndardaǵy jumys oryndarynyń eń az degende 70 paıyzy saqtalynady dep josparlanýda.
