QR Premer-Mınıstri: Biryńǵaı zeınetaqy qoryna memleket úlken kepildik beredi
ASTANA. 5 mamyr. QazAqparat - Biryńǵaı qordyń zeınetaqy aktıvterin tek qana Ulttyq bank basqarady. Bul týraly Úkimet basshysy Serik Ahmetov búgin «Habar» telearnasyndaǵy «Jeti kún» baǵdarlamasyna bergen suhbatynda aıtty.
«Qazir Parlament qaraýynda jatqan jańa zań qabyldansa, elimizde Biryńǵaı jınaqtaýshy zeınetaqy qory qurylady. Osy qordy kim basqarady ári qorda qarajattyń saqtalýyna kim kepildik beredi?» -degen tilshi saýalyna Serik Ahmetov: «Biryńǵaı qordyń zeınetaqy aktıvterin tek qana Ulttyq bank basqarady. Bul jumys Memleket basshysynyń janynan qurylǵan arnaıy keńestiń baqylaýynda bolady. Qordyń qyzmeti tek halyqtyń zeınetaqy jınaǵynyń saqtalýyna, onyń ósýine baǵyttalǵan jáne buǵan memleket úlken kepildik beredi»,-dep jaýap berdi.
